Martın son günləri Azərbaycan futbolunda iz buraxdı. Avropa miqyasında baş tutan qarşılaşmalar və yoldaşlıq matçları cücərən ümidləri puç etdi.

Sən demə, mətbuat konfranslarında danışılanlar, verilən rəsmi açıqlamalar “yumaq”dan başqa bir şey deyilmiş. Hazırda futbol ictimaiyyəti qəzəbli azarkeşlərlə üz-üzə qalıb. Hər kəs qızğın müzakirələri diqqətlə izləyir və yeni addımların hansı yöndə atılacağını səbirsizliklə gözləyir. Gəlin millilərimizin iştirakı ilə yaşıl meydanlarda başverənlərin icmalına nəzər salaq.

17 yaşadək qızlardan ibarət yığma martın 22-də Avropa çempionatının seçmə mərhələsində ilk oyununu keçirdi. Qazaxıstanla qarşılaşan komanda 2:0 hesablı qələbə qazandı. Qollara Ayşən Salamzadə və Aydan Həsənova imza atdı. Motivasiyası yenilənən komanda növbəti görüşdə bunun davamını gətirə bilmədi. U-17-martın 25-də Bosniya və Hersoqovinaya 0:2 hesabı ilə məğlub oldu. Qrupun son və həlledici oyununda isə darmadağın olduq. Martın 28-də Monteneqro ilə gerçəkləşən qarşılaşma rəqibin 6:1 hesablı qələbəsi ilə başa çatdı. Komandanın yeganə qolunu 34-cü dəqiqədə Ayşən Salamzadə vurdu.

Beləliklə, təmsilçimiz 2-ci qrupda keçirdiyi 3 oyundan sonra 3-cü pillədə qərarlaşdı. Qapısında grdüyü 8 qola 3 qolla cavab verən U-17-nin performansı qənaətbəxş olmadı.

U-19 millimiz Bakıda təlim-məşq toplanışı çərçivəsində Şimali Makedoniyaya qarşı iki yoxlama oyununda iştirak etdi. Martın 24-də baş tutan ilk matç heç-heçə (0:0) nəticələnsə də, növbəti görüşdə rəqib 2:1 hesabı ilə qalib gəldi. Sənan Ağalarov 49-cu dəqiqədə rəqib qapıçını məyus etdi. Bu nisbətən ürəkaçan nəticədi.

19 yaşadək futzalçılardan ibarət milli isə Avropa çempionatının əsas mərhələsinin qrup oyunları çərçivəsində 3 oyun keçirdi. Yığma uyğun ardıcıllıqla Fransaya 0:5, Bosniya və Hersoqovinaya 1:4, Yunanıstana isə 3:11 hesabı ilə məğlub oldu. Şahbaz Həmdəmli ikinci oyunda turnirdə ilk qolumuzun müəllifi oldu. Qələbə şansının ən çox qiymətləndirildiyi son matçda isə Rüfət Məmmədli, Fərid Abbasov və Şahbaz Həndəmli fərqləndi. Futzalçılar qrupu 0 xalla sonuncu pillədə başa burdu. Bu rəzalət də Azərbaycan futzal tarixinə qara hərflərlə düşdü. Buraxdığı 20 qola 4 qolla qarşılıq verən milli rəqiblərindən həm də fiziki cəhətdən geri qaldı. Hətta baş məşqçi əvəzləyicisi İlqar Aslanov azarkeşlərdən üzr istədi.

U-21 Türkiyədə iki yoldaşlıq oyunu keçirdi. Martın 23-də Albaniyanın, 26-da isə Sloveniyanın müvafiq yaş qrupundan ibarət komandası ilə qarşılaşdıq. Milli ilk oyunda 1:2 hesablı məğlubiyyətlə üzləşsə də, ikinci matçda iki cavabsız qolla qalib gəldi. Samir Əliyevin dəvət etdiyi futbolçular özünü yaxşı tərəfdən göstərməyi bacardı. Bu performans azarkeşlərdə növbəti matçlardan daha yaxşı nəticə gözləmək üçün ümid yaradıb.

Ölkənin əsas komandasının “yazdığı tarixdən” danışmağa dəyməz. Canni de Byazinin yetirmələri öncə martın 24-də Avstriyaya 1:4 hesabı ilə məğlub oldu. Emin Mahmudovun vurduğu təsəlli qolu 64-cü dəqiqəyə təsadüf etdi. İkinci oyunda isə fiasko yaşandı. İsveç 5 cavabsız qolla De Byazinin komandasını darmadağın etdi. Həqiqətən sözügedən oyunlar Azərbaycan futbolunun böyük təhlükədə olduğunu və gələcəyinin çoxsaylı suallar altında çabaladığını göstərdi. Hazırda həm baş məşqçi, həm futbolçular, həm də AFFA ağır tənqidlərin hədəfindədi. Problemin necə həll ediləcəyi maraq doğurur.

KƏNAN BAHADIR