Bir neçə gün əvvəl Məhəmməd Salahın Qahirədəki evinin qarət edildiyi məlum olmuşdu. Misir polisi artıq cinayətkarları yaxalayıb.

"Football-plus.az" xəbər verir ki, ölkə yığmasının kapitanına məxsus Afrika Millətlər Kuboku-2022-nin gümüş medalı tapılıb. “Liverpul”un hücumçusunun medalının onun evini qarət edən iki şəxs tərəfindən oğurlandığı müəyənləşib.

Onlar artıq həbs olunublar. Misir Daxili İşlər Nazirliyi həbs edilənlərdən birinin Salahın da evinin daxil olduğu yaşayış kompleksinin keçmiş mühafizəçisi olduğu haqda məlumat yayıb.

Qeyd edək ki, martın 2-də baş verən qarət hadisəsi zamanı oğurlanan digər əşyalar arasında 3 cüt futbol butsu da olub. Polis Məhəmmədin yalnız qitə çempionatında qazandığı gümüş medalı yox, bütün əşyaları geri qaytara bilib.