İlk oyundakı qələbədən sonra “Trabzonspor” “Sent Yakob Park”a böyük ümidlərlə yollanmışdı.

Komanda sanki bu matçı da evdə keçirirdi. Qürbətçi türklər oyuna böyük maraq göstərmişdilər. 24428 azarkeşdən ən azı yarısı trabzonluları dəstəkləyirdi. Amma qaradənizlilər ümidləri doğrulda bilmədi. Komandanın bu mövsümdəki səfər və bəxtsizlik sindromu yenə özünü biruzə verdi.

Avcının komandası oyuna hücumlarla başlasa da, erkən qol buraxaraq hesabda geri düşdü. 13-cü dəqiqədə uzun ötürməni qəbul edərək boş zonaya daxil olan Məhəmməd Zəki Amduni topu Uğurcan Çakırın ayaqları arasından tora göndərdi. Amduni əslən türkdü. “Bazel”də ilk mövsümünü keçirən və avrokuboklarda debüt qolunu vuran 22 yaşlı forvardın atası türk, anası tunislidi. Amduni 2021-də hətta Türkiyənin gənclər yığmasında heyətində meydana çıxsa da, sonda İsveçrə yığmasına üstünlük verdi və artıq bu komandada debüt də edib. Bu andan etibarən oyun faktiki təkqapı getməyə başladı. Hiss olunurdu ki, qonaqların qolu zaman məsələsidi. Hissənin ortalarında Qomesə qarşı kobduluqdan sonra ispaniyalı hakim Mateo Laos “nöqtə”ni göstərdi. Amma komandanın ştatlı penalti vuranı Bakasetas tribunada və ekran başında oyunu izləyən milyonlarla türkiyəli futbolsevəri məyus etdi. Yunanıstan yığmasının kapitanının zərbə anında ayağı sürüşdüyü üçün top qapının yanından keçdi! İkinci hissədə trabzonlular sanki qol qaçırmaq üzrə yarışa girdilər. Komandanın az qala hər hücumu təhlükəli alınırdı. 51-ci dəqiqədə qapıçının Qomesə qarşı kobudluğundan sonra Laos 2-ci dəfə qonaqların xeyrinə penalti verdi. Amma çox keçmədən VAR-ın məsləhəti ilə monitora baxandan sonra qərarını dəyişdi. 61-ci dəqiqədə hücuma qoşulan Densvil başla topu tora göndərdi. Böyük sevinc yaşayan trabzonluların yandırdıqları petardların tüstüsündən bir müddət göz-gözü görmədi. Amma bu sevinc boşa çıxdı. VAR Densvildə cüzi də olsa, oyundankənar vəziyyət qeydə aldı. 76-cı dəqiqədə isə bəlkə də ikinci hissədə ilk dəfə mərkəzi keçən “Bazel” 2-ci qolu vurdu! Qapıçının qaytardığı topu Zekiri tora göndərdi. Bu oyun faktiki Türkiyə çempionunun cari mövsümdəki performansının qısa özəti oldu. Komanda sanki səfər oyunlarında lənətlənib. Son anlarda Umut Bozokun da qolu ofsayd üzündən qeydə alınmadı. Beləcə bu qəribə ssenarili qarşılaşmada futbol Tanrısı ilə ulduzu barışmayan “Trabzonspor” məğlub olmaqka avrokubok macərasını başa vurmalı oldu. Bundan sonra yoluna üç klubla davam edəcək Türkiyə əmsallar cədvəlində 12-ci pillədədi. Sevindirici məqam odu ki, 10-cu pillədəki Avstriya ilə 11-ci pillədəki Serbiyanın artıq heç bir təmsilçisi qalmayıb. Yəni qardaş ölkənin mövsümü ilk “10-luq”da tamamlamaq üçün gözəl şansı var.