İlin ən baxımlı oyunu məhz mundiala təsadüf etdi.

Football-plus.az xəbər verir ki, özü də finala. Dekabrın 18-də Lusail şəhərində keçirilən Argentina – Fransa matçını izləməyə dəyərdi. Finalın süjet xətti yetərincə maraqlı alındı. İlk hissə Argentinanın 2:0 hesablı üstünlüyü ilə başa çatdı. 80-ci dəqiqəyə qədər meydanda hakim olan “albiselesta”nın qələbəsinə böyük ölçüdə şübhə yeri qalmamışdı. Lakin fransızlar Kilian Mbappenin bir dəqiqəyə vuduğu iki qolla matça intriqa qatdılar.

30 dəqiqəlik əlavə vaxtda tərəflər hərəyə bir qol vurduğundan qalibi penalti seriyası müəyyənləşdirdi. Bu sınaqdan məğlub ayrılan (2:4) Fransa yığması ardıcıl ikinci dəfə çempion olmaq imkanından yararlana bilmədi. Bəzi mütəxəssislər Lusaildəki dramatik mübarizəni hətta dünya çempionatları tarixinin ən baxımlı finalı sayırlar.