Gənclər və İdman Nazirliyinin rəsmi “feysbuk” səhifəsi ilin ən yaxşılarını seçir.

Qurum müxtəlif nominasiyalar üzrə namizədlərin adlarını açıqlayıb. Təəssüf hissi ilə qeyd edirəm ki, ilin ən fəal idman jurnalisti və idman media qurumu arasında nə “Futbol+”in, nə də əməkdaşının adı var. Nazirlik belə düşünür ki, biz idmandankənar media qurumuyuq, ancaq futboldan yazırıq. Eybi yox, qoy, elə olsun.

“İlin ən fəal idman jurnalisti” nominasiyası ilə bağlı fikirlərimi şəxsi “feysbuk” hesabımda qeyd etmişəm. Təkrarçılığa ehtiyac yoxdu. Qısaca onu deyə bilərəm ki, həmin siyahıda mənim və ya “Futbol+”in əməkdaşlarından kiminsə adı olmalı idi. Bu yazıda isə nazirliyin hazırladığı siyahının nə qədər absurd olduğu ilə bağlı məqamları diqqətinizə çatdıracam.

Başlayaq elə “ilin ən fəal idman jurnalisti” nominasiyasından. Deyəsən, Gənclər və İdman Nazirliyinin mətbuat xidmətinin xəbəri yoxdu ki, Sənan Abdullayev artıq “Xəzər” TV-də işləmir. O, PFL-in media və marketinq direktoru vəzifəsində çalışır. Həmkarımızın təyinatı 5 aydı təsdiqlənib. Amma nədənsə AGİN onu hələ də “Xəzər” TV-nin əməkdaşı kimi göstərir. Təbii ki, Sənan bəyin bu məsələdə günahı yoxdu. O, hazırkı vəzifəsini olduqca yaxşı icra edir. Amma nazirlikdə çalışanların onu hələ də telekanal əməkdaşı kimi qələmə verməsi və ən fəal jurnalistlərin siyahısında göstərməsi absurddu.
İkinci diqqətçəkən məqama keçmək istəyirəm. 2022-ci ilin “ən yaxşı kişi komandası” nominasiyasında minifutbol yığmasının adı qeyd olunub. Lakin “ilin idman federasiyası” nominasiyasında Minifutbol Federasiyasının adına rast gəlinmir. Niyə? Bu qurumun tərkibində olan komanda Avropa çempionu olub. Özü də yığma üzvlərinin hamısı azərbaycanlıdı. Heç bir legionerdən və “milliləşdirilənlərdən” istifadə etməyiblər. Nəyə görə federasiyanın işini aşağılayır və ya qiymətləndirmirsiz?

Ən absurd məsələ isə “ilin idman klubu” nominasiyası ilə bağlıdı. Burda “Qəbələ” və “Sabah”ın adı var, amma “Zirə”nin yox. Bəlkə “qırmızı-qaralar”ı başa düşmək olar. Qəbələ təmsilçisi idman klubu kimi də fəaliyyət göstərir. Ola bilər ki, adlandırmadan????? nazirlik səhv etsin. Bu ilk səhvləri deyil ki… Amma konkret FK olaraq göstərilibsə, bunun özü daha da biabırçılıqdı. İl ərzində “Sabah” və “Qəbələ” hansı uğurlara imza atıb? Heç nə! Elmar Baxşıyevin komandası Konfrans Liqasının 2-ci təsnifat mərhələsinə premyer-liqada 4-cü olaraq vəsiqə qazanıb. Vəssalam! “Sabah”dan isə danışmağa ehtiyac yoxdu. Klub, sadəcə, hazırda çempionatda ikinci sırada qərarlaşıb. Mövsüm bitməyib ki, bunu uğur kimi təqdim edələr. Amma “Zirə” premyer-liqanın 2021/22 mövsümündə premyer-liqada bürünc medal qazanıb, ölkə kubokunun finalında oynayıb. Bu nəticələri əldə edən Rəşad Sadıqovun komandasının adı siyahıda yoxdu.

Jurnalistlər məsələsini qoyduq kənara. Ola bilər ki, adımız futbolla bağlıdı deyə bizi görmürsüz. Bəs başqa məsələlər? Hazırladığınız siyahı ilə özünüzü niyə biabır edirsiz? Kimə və nəyə lazımdı bu təqdimat, belə qalib seçmək? Kimi aldadırsız? Azərbaycan xalqını? Təbii ki, yox! Onsuz da hər kəs burda qeyd etdiklərimi görür və sizə gülür...

İLKİN SULTANLI