Birinci divizionun son turunda gözlənilməz nəticə qeydə alındı. "Şamaxı-2" doğma meydanda "Kəpəz-2"ni minimal hesabla yendi.
Halbuki gəncəlilər 7 tur idi məğlub olmurdu. Bunu nəzərə alaraq "Football-plus.az" saytı olaraq "Kəpəz-2"nin baş məşqçisi Xaliq Mərdanovla söhbətləşdik.
- Öncə oyunla bağlı təəssüratınızı bölüşərdiz…
- Oyun normal, istədiyimiz şəraitdə keçdi. Qol vəziyyətləri ilə zəngin qarşılaşma alındı. Fərqlənmək üçün fürsətlərimiz olsa da, yararlana bilmədik. Rəqib də pis oynamadı. Sadəcə, onlar epizodların birini qola çevirdi.
- Rəqibin 90+2-ci dəqiqədə fərqlənməklə qalib gəlməsi komandanın psixoloji durumuna zərbə vurmayacaq?
- Əlbəttə, uzatma dəqiqələrində qol buraxmaqla uduzmaq xoş deyil. Amma düşünmürəm ki, bu məğlubiyyət işimizə mane olsun. Qarşıdakı oyunlara hazırlaşaraq daha yaxşı çıxış etməyə çalışacağıq.
- Oyunboyu əvəzetmələrə ehtiyac duymadız. Səbəb nədi?
- Ehtiyat oyunçular skamyasında yer alanlar gənclərdi. Onların da öz bacarıqlarını göstərməsi üçün şərait yaradırıq. Sadəcə, bu matçda, heç olmasa, 1 xal qazanmağı hədəfləyirdik deyə, risk etmək istəmədim.
- Rauf Əliyevlə Əli Səmədov son oyunlarda qollar vurmaqla "Kəpəz-2"yə qələbələr qazandırır. Onlar haqda nə deyə bilərsiz?
- Hər iki futbolçunun çıxışından məmnunam. Əvvəl də demişəm, Raufla Əli kimi təcrübəli futbolçuların bizimlə birgə olması komanda və gənclər üçün ayrıca motivasiyadı.
- "Kəpəz"in həm əsas, həm də əvəzedici komandası mövsümə uğursuz start verdi. Əsas komanda hələ də uğursuzluq zolağında qalsa da, sizin rəhbərlik etdiyi kollektiv sıçrayış edərək 7 oyunda uduzmadı. Hətta böyükhesablı qələbələrlə ilk "3-lüy"ə yaxınlaşdız. Mükafatçılar sırasında yer almağı düşünürsüz?
- Hər iki komandamız yenidən təşkil olunub. Sabit çıxış üçün vaxta və yaxşı maliyyəyə ehtiyac var. Düşünürəm ki, zamanla buna nail olacağıq. Qarşımıza qoyulan əsas məqsəd “Kəpəz” üçün futbolçu yetişdirmək və Gəncədə yerli futbolçuların inkişafına nail olmaqdı.
- Tərlan Əhmədov “Kəpəz-2”də çıxış edən futbolçuları izləyir?
- Bəli. Tərlan müəllim həm əvəzedici, həm də U-19 komandamızdakı futbolçuları yaxından izləyir.
ABDULLA İSMAYILOĞLU