Xaliq Mərdanov: “Qələbə qazanan sevinəndə, bu, qarşı tərəfdə qıcıq yaradır”
Birinci divizionun 11-ci turunda “Kəpəz-2” Binə qəsəbə stadionunda “Qarabağ-2”ni 4:1 hesabıyla məğlub etdi.
AFFA-nın İntizam Komitəsi son iclasında isə hər iki klub sərt cəzalandırıldı. Belə ki, “Qarabağ-2”nin futbolçusu Şirxan Həsənzadə rəqib futbolçuları təhqir etdiyinə görə 3 oyunu kənardan izləyəcəksə, klub 160 manat cərimələnib. Komandanın digər futbolçusu Rəhim Cəfərli isə rəqib futbolçuya qarşı sərt oynadığına görə birbaşa qırmızı vərəqə ilə meydandan kənarlaşdırılıb. Ona 4 oyunluq cəza verilib, komandası 320 manat cərimələnib. Həmçinin oyundan sonra təhlükəsizliyin təmin edilmədiyi üçün baş verən kütləvi intizamsızlığa görə “Qarabağ-2” daha 400 manat ziyana düşüb. Kütləvi intizamsızlıq baş verərkən qonaqların bəzi oyunçuları rəqib həmkarlarını təhqir edib. Gəncə klubu bunu 160 manatla “sığortalayacaq”.
Maraqlıdı, meydanda nə baş verib ki, hakimin final fitindən sonra kütləvi intizamsızlıq qeydə alınıb? Bu qədər cəza və cərimənin səbəbi nədi? Bu suallarla “Qarabağ-2”nin baş məşqçisi Cavad Mirzəyevə müraciət etdik:
“Hakimlik barədə çox danışmaq istəmirəm. Amma düşünürəm ki, bizim futbolçular belə sərt cəzalanırdısa, rəqib komanda üçün də eyni addım atılmalı idi. Çünki insidenti başladan Gəncə təmsilçisi idi. Təbii ki, xoşagələn hal deyil. İstər-istəməz meydanda biri digərinə söyüş söyəndə qarşılığı olur. Belə olan halda isə hakimlər bir tərəfi cəzalandırır, digər tərəfi yox. Rəqib komandanın futbolçuları, sadəcə, cərimə olunur, amma bizim komandaya konkret cəza verilir. Bu, ikili standartdı. Təhqir edən onlar olubsa, niyə cəzalanmırlar? Oyundan sonra da bizim futbbolçulara qarşı təhqiramiz ifadələr işlədilib. Şirxan Həsənzadə onlara cavab verib. Mən futbolçunu buna görə danlamışam. Amma istənilən halda, heç kim qarşı tərəfin şəxsiyyətini alçatmamalıdı. Şirxana cəza verilib, amma onu bu hərəkətə məcbur edənlər cəzalanmayıb”.
Bu sözlərdən sonra belə fikir yaranır ki, problemin səbəbkarı Gəncə təmsilçisidi. Bunu nəzərə alaraq “Kəpəz-2”nin baş məşqçisi Xaliq Mərdanovla əlaqə saxladıq:
“Meydanda oyun epizodu olub. Rəqib futbolçu sərt oynadı, qırmızı vərəqə aldı və meydandan çıxdı. Bizlik heç nə yoxdu. Orda hakimin təhqir olunduğunu deyə bilmərəm. Yan xətt tərəfdə olub, bizdən uzaqda idi. Oyundan sonra isə bildiyim qədər bizim futbolçular seviniblər, onlar da buna qıcıqlanıb. Normaldı, qələbə qazanan sevinəndə, bu, qarşı tərəfdə qıcıq yaradır. Bir var, sadəcə, sevinəsən, bir də var, qıcıq yaratmaq üçün bunu edəsən. Orda hansı olduğunu bilmirəm. Ən doğrusunu Allah bilir".
ŞAİR ABDULLA
