Xaliq Mərdanov Rauf Əliyevdən razıdı
Birinci divizionun 6-cı turunun diqqəti çəkən qarşılaşmalarından biri də "Kəpəz-2" ilə "Mingəçevir" arasında keçirildi.
Gəncəlilər, nəhayət, mövsümdə ilk qələbəyə sevindi. Komadaya 3 xalı Rauf Əliyev qazandırdı.
Həm millinin sabiq üzvünün oyunu, həm də "Kəpəz-2"nin ilk qələbəsiylə bağlı komandanın baş məşqçisi Xaliq Mərdanovun fikirlərini öyrəndik: "Rauf Əliyev kimi təcrübəli futbolçunun komandamızda oynaması gənclər üçün ayrıca motivasiyadı. Onun kimi təcrübəli oyunçunun komandada olması çox vacibdi. Məşqlərdə bütün tapşırıqlarımı yerinə yetirməklə yanaşı, gənclərlə təcrübəsini də bölüşür. "Mingəçevir"lə oyunda da özünü yaxşı tərəfdən göstərdi, qol vurdu. Amma heç bir xüsusi emosiya ilə sevincini qeyd etmədi. O da hamı kimi komandanın uğurunu daha çox düşünür. Raufun bundan sonra da çox fayda verəcəyini düşünürəm. Oyuna gəlincə, əvvəl də qeyd etmişdim: çox qol fürsəti yaxalasaq da, son nöqtəni qoymaqda çətinlik çəkirik. Epizodları dəyərlədirə bilməmək, qələbəsizlik futbolçularda psixoloji gərginliyə, ruh düşkünlüyünə gətirib çıxarır. Əslində son matçda çox qol imkanımız olmadı. Amma məşqlərdə standart vəziyyətlər üzərində çox çalışmışdıq. Qolu da məhz künc zərbəsindən sonra vurduq. İstənilən qələbə futbolçulara əlavə güc verir. İnanıram ki, bu 3 xal ruh yüksəkliyini qaldıracaq və qələbələrin sayı artacaq".
ABDULLA İSMAYILOĞLU
