Qətərdə keçirilən dünya çempionatı davam edir.
Bu gün 1/4 finalın son iki iştirakçıları bəlli olacaq. Dünyanın müxtəlif ölkələrindən insanlar mundialın oyunlarını izləmək üçün adı çəkilən ölkəyə səfər edirlər. Bura gedənlər arasında azərbaycanlılar da var. Onlardan biri tanınmış idman hüquqşünası Fərid Haqverdiyevdi. Artıq Azərbaycana qayıdan vəkillə əlaqə saxladıq. Fərid bəydən Qətərə oyunları izləmək, yoxsa iş üçün getdiyini soruşduq. Vəkil “Football-plus.az”a açıqlamasında bunları söylədi:
“Qətərdə keçirilən dünya çempionatına azarkeş kimi getmişdim. Biletləri 2-3 ay öncədən almışdım. Qrup mərhələsinin Braziliya - Kamerun matçını stadiondan izlədim. Digər matçlara isə “FİFA fan festival” adlanan yerdə baxdım. Burda böyük ekranlar quraşdırılıb. Oyunu izləməkdən başqa maraqlı viktorinalarda iştirak edə bilirsən. Braziliya - Kamerun matçını seçməyimin səbəbi var idi. Çünki Avropa ölkələrinin oyunlarını az-çox stadiondan izləmişəm. Lakin hər iki komanda Avropadan kənarda olduğu üçün onlar arasında qarşılaşma mənə maraqlı gəldi. Bundan əlavə, matç mundialın finalının baş tutacağı “Lusail Aykonik” stadionunda keçirilirdi. Bu da marağımı cəlb etmişdi. Qısaca, arenanı da görmək istəyirdim. Həmçinin braziliyalı Tyaqo Silvanın vəkili dostumdu. Düzdü, görüşümüz baş tutmadı. Çünki o, sonradan ölkəsinin yarımfinala vəsiqə qazanacağı halda Qətərə gələcəyini bildirdi. DÇ-də çalışan azərbaycanlılarla görüşə bilmədim. Lakin uzun illərdi Qətərdə yaşayan və burda başqa sahədə işləyən həmyerlilərimizlə görüşdüm”.
Fərid Haqverdiyev mundialın təşkilatçılığının yüksək səviyyədə olduğunu dilə gətirdi:
“Mənə maraqlıdı ki, insanlar niyə şikayətlənirlər? Heç nə deyilənlər qədər deyildi. Metro, tramvay, qatarlardan xüsusi vizası olanlar pulsuz istifadə edir. Gecikəndə də xüsusi taksi şirkətlərindən istifadə edə bilirsən. Könüllülər həddən artıq çoxdu. Bu da öz növbəsində yaxşı haldı. Çünki onlardan rahat şəkildə hara və necə getməli olduğunu soruşa bilirsən. Stadiona daxil olanda da problem yaşamırsan. Sıxlıq olmur. Arenanı dövrə vurub, rahat şəkildə öz yerini tapa bilirsən. Qaldığım otelə də metro ilə qayıtdım. Hər şey asan və rahat idi. Açığı, təşkilatçılıqla bağlı hansısa problem yoxdu. Ümumilikdə Qətər balaca ölkədi, rahat gəzə bilirsən. Hətta çimərliyə də baş çəkdim. Yeganə mənfi məqam qiymətlərlə bağlıdı. Hər şey bahadı (gülür). Ümumiyyətlə, hər şey bu ölkəyə xaricdən idxal olunduğu üçün qiymətlər yüksəkdi. Məsələn, DÇ ilə bağlı suvenirlər Avropa ölkələrinə nisbətdə olduqca bahadı. Amma ümumilikdə hər şey çox xoşuma gəldi. Azarkeşlər əylənir, deyir-gülürdülər. Əsl festival ortamı var idi”.
İLKİN SULTANLI