Sabah Misli premyer-liqasının 16-cı turuna start veriləcək.

Football-plus.az xəbər verir ki, həftənin oyunları 3 gündə keçiriləcək. Cümə axşamı “Neftçi” - “Qarabağ” dueli baş tutacaq. Şənbə günü “Qəbələ” “Səbail”i, “”Sabah” “Şamaxı”nı sınağa çəkəcək. Tura bazar günü yekun vurulacaq. “Kəpəz” “Sumqayıt”la, “Zirə” isə “Turan Tovuz”la münasibətlərə aydınlıq gətirəcək.

Misli premyer-liqası
2-ci dövrə, 16-cı tur
2 dekabr
Neftçi - Qarabağ
Cəzalı: yoxdu.
AFFA nümayəndəsi: Elçin Məmmədov.
Bakı. Bakcell Arena. Saat 21.00.

Azərbaycan derbisi maraqla gözlənilir. Bu görüş premyer-liqanın gələcək taleyinə təsir edə bilər. “Neftçi” ardıcıl 2 turdu ki, qələbə qazanır. “Qarabağ” isə qələbəyə həsrətdi. Buna əsasən deyə bilərik ki, bakılılar yüksələn qrafikdədilər. Ağdamlılar isə vəziyyət o qədər yaxşı deyil. İtkilər baxımından da flaqmanda işlər qaydasındadı. Komandanın heyətində cəzalı yoxdu. Zədəli isə ancaq Voyislav Stankoviçdi. “Qarabağ”da isə 4 zədəli var. Filip Ozobiçlə Marko Veşoviç oyunu buraxacaqlar. Bu, dəqiqdi. Abbas Hüseynovla Marko Yankoviçin isə durumu bəlli deyil. Bütün bunları nəzərə aldıqda “Neftçi”ni oyunun favoriti hesab etmək olar. Lakin “Qarabağ”ın iki bərabər səviyyəli heyəti olduğunu və Qurban Qurbanovun əvəzləmələrinin istənilən zaman oyunun taleyini həll edə biləcəyini unutmayaq. Bu görüş həm də hər iki komandanın 10-cu çempionluğu baxımından önəmlidi. Bu görüşdə qələbə qazanan komanda yubiley qalibiyyət uğrunda iri addım atmış olacaq.

Ümumiyyətlə, bu komandalar Azərbaycan çempionatlarında 88 dəfə üz-üzə gəliblər. Bu görüşlərin 23-də “Neftçi”, 35-də “Qarabağ” qələbə qazanıb. 30 görüş isə heç-heçə başa çatıb. Bu qarşılaşmalarda bakılılar 80, ağdamlılar isə 107 dəfə fərqləniblər.

3 dekabr
Qəbələ - Səbail
Cəzalı: yoxdu.
AFFA nümayəndəsi: Bəhram Qurbanov.
Qəbələ. Şəhər stadionu. Saat 14.30.

Hər iki komanda son turlarda qələbəyə həsrətdilər. Bu komandaların mövsümün əvvəlində avrokuboklara iddialı olacaqları deyilirdi. Lakin indi vəziyyət tam fərqlidi. Düzdü, “Qəbələ”nin şansı var. “Qırmızı-qaralar” həm də kubokda yollarına davam edirlər. “Səbail”i də siyahıdan silmək olmaz. Onlar da Azərbaycan kubokunda mübarizəsini davam etdirir. Lakin çempionatda işləri qaydasında getmir. Hər iki komanda bu görüşdə qələbə qazanıb vəziyyəti düzəltmək istəyir. Meydan sahiblərini qarşılaşmanın favoriti hesab etmək olar. Lakin “Səbail”in də qələbə qazanması sensasiya sayılmayacaq.



Ümumiyyətlə, bu komandalar Azərbaycan çempionatlarında 20 dəfə üz-üzə gəliblər. Bu görüşlərin 10-da “Qəbələ” qələbə qazanıb. 5 qarşılaşmada isə sevinən tərəf bakılılar olub. 5 görüşdə isə qalib müəyyənləşməyib. İndiyə kimi “Qəbələ” 35, “Gəmiçilər” isə 20 qol vurmağı bacarıb.

Sabah - Şamaxı
Cəzalı: yoxdu.
AFFA nümayəndəsi: Erkin Hüseynov.
Bakı. Bank Respublika Arena. Saat 17.00.

Hər iki komanda yüksələn performans sərgiləyirlər. Bu komandalar 3 turdu ki, uduzmurlar. Qarşılaşmada favorit sözsüz ki, “Sabah”dı. “Bayquşlar” bu mövsüm çempionluq uğrunda mübarizə aparırlar. Lakin “şirlər”in son turlardakı çıxışı alqışa layiqdi. Murad Musayevin komandası Cavid Hüseynov və Vüqar Əsgərlinin birgə rəhbərlik etdiyi kollektivi məğlub etmək potensialındadı.



Ümumiyyətlə, bu komandalar Azərbaycan çempionatlarında 15 dəfə üz-üzə gəliblər. Komandalar hərəyə 5 qələbə qazanıblar. 5 görüşdə isə qalib müəyyənləşməyib. Topların nisbətində isə şamaxılılar öndədi - 16:15.

4 dekabr
Kəpəz - Sumqayıt
Cəzalı: yoxdu.
AFFA nümayəndəsi: Rüfət Əmirov
Gəncə. Şəhər stadionu. Saat 14.30.

Turun ən maraqlı görüşlərindən biri Gəncədə keçiriləcək. “Kəpəz” son turlarda ancaq heç-heçə edib. Tərlan Əhmədovun komandası autsayderlər qrupundan uzaqlaşmaq istəyir. Bu səbəbdən də doğma meydanda “kimyaçılar”ı məğlub etməlidi. Samir Abasovun komandası isə “Qəbələ” ilə heç-heçənin təsadüf olmadığını sübut etməlidi. Bu səbəbdən də öz gücündə olan gəncəliləri səfərdə məğlub etməlidi. Əks-halda Samir Abasovun islahatlarının düzgün olmadığı bəlli olacaq.



Ümumiyyətlə, bu komandalar Azərbaycan çempionatlarında 21 dəfə üz-üzə gəliblər. Bu görüşlərin 8-də “Sumqayıt” qələbə qazanıb. 5 matçda sevinən tərəf “Kəpəz” olub. 8 görüşdə isə qalib müəyyənləşməyib. “Sumqayıt” 28, “sarı-göylər” isə 22 qol vurmağı bacarıb.


Zirə - Turan Tovuz
Cəzalı: yoxdu
AFFA nümayəndəsi: Ramiz Mustafayev
Bakı. Zirə İdman Kompleksinin stadionu. Saat 17.00.

Həftənin son oyununda “Zirə” “Turan Tovuz”u qəbul edəcək. Matçın favoriti bakılılardı. Ümumiyyətlə, “qartallar” avrokuboklara vəsiqə qazanmaq istəyirlərsə, bu görüşdə qələbə qazanıb, rəqiblərindən uzaqlaşmalıdı. “Turan Tovuz” da bu şansı əllərində saxlayıb. Ayxan Abbasovun komandası da qələbə qazanaraq alt pillələrdə qərarlaşan rəqiblərindən uzaqlaşmaq arzusundadı.



Ümumiyyətlə, bu komandalar Azərbaycan çempionatlarında 1 dəfə üz-üzə gəliblər. Bu mövsümün ilk dövrəsində baş tutan oyunda "Zirə" səfərdə "Turan Tovuz"u 3:1 hesabı ilə məğlub edib.

İLKİN SULTANLI