Ötən həftə Misli premyer-liqasının 13-cü turunda baş turan "Turan Tovuz" - "Şamaxı" qarşılaşmasında qonaqlar mövsümdə ilk qələbəsini qazandı.

Bunda pay sahibi olanlardan biri də "aslanlar"ın kapitanı Elvin Məmmədovdu. "10 nömrə" matç zamanı mübarizliyi ilə seçilməklə yanaşı, 2 məhsuldar ötürməylə də diqqəti çəkdi. "Football-plus.az" saytı olaraq millimizin sabiq üzvüylə "Şamaxı"nın ilk qələbəsi və qarşıdakı planlarla bağlı danışdıq.

- Uzun müddət qələbəsizlik seriyasının səbəbi nə idi?
- Heyətdə gənc və təcrübəsiz futbolçular çoxdu, pemyer-liqa təcrübəsi olmayanlar belə var. Buna baxmayaraq, meydanda can qoyur, sona qədər döyüşürük. Şans, bəxtin bizdən üz döndərdiyi oyunlar da az deyildi. Oyun planında, hücumda üstü olurduq, amma uzatma dəqiqələrində qol və qollar buraxmaqla uduzurduq. Biz hər matça qələbə və xal qazanmaq üçün çıxırıq. Düşünürəm ki, "Turan Tovuz" üzərində qələbə dönüş nöqtəsi, növbəti görüşlər üçün motivasiya olacaq və qələbələrimizin davamı gələcək. Demirəm, bütün oyunlarda mütləq qələbə qazanacağıq, amma hər matça final qarşılaşması kimi çıxacağıq.

- 35 yaşında özünü 90 dəqiqə oynamağa hazır sayırsan?
- Əlbəttə, oynamaq gücündəyəm. Məşqçilər korpusu başda olmaqla mənə güvənib şans verən hər kəsə dərin minnətdarlığımı bildirirəm. Mən də onların güvənini doğruldaraq təcrübəm və oyunumla komandama fayda verməyə çalışıram.

- Çoxdandı qol vurmursan. Qol duyumun zəifləyib, yoxsa əsas məqsəd komandaya faydalı olmaqdı?
- Qol vurmaq gözəl hissdi, amma mən komandamızın qələbələr, xallar qazanmasında maraqlıyam. Elə komanda yoldaşlarıma assistentlik etməyim qol vurmağım deməkdi.

- "Turan Tovuz"la matçda bəzi azarkeşlər ünvanına nalayiq ifadələr səsləndirdi. Sənə qarşı bu qıcığın səbəbi nədi?
- Səbəbin nə olduğunu bilmirəm. Əsas məni alqışlayanların olduğunu görməkdi. Tovuzlu azarkeşlər uduzmağı, xal itirməyi sevmir. Ona görə də narazılığı, etirazı normal qarşılayaram. Amma söyüş, təhqir yağdıranlar futbolun, azarkeşliyin mahiyyətini dərindən anlamayan şəxslərdi. Onlar, sadəcə, stadiona gələnlərdi.

- "Şamaxı"nın əsas hədəfi nədi?
- Qarşımıza hədəf qoyulmayıb. Məqsədimiz günü-gündən inkişaf etməklə oyun planında, nəticələrimizdə artırmaq və heyətdəki gəncləri Azərbaycan futboluna qazandırmaqdı.

- Millimizin sabiq üzvü kimi ölkənin əsas komandasının hazırkı durumundan razısan?
- Son oyunlara nəzər yetirsək, millimizdə inkişaf hiss olunur. Püşkatma bizi çətin qrupa saldı. Rəqiblərimizin hər biri güclü komandalardı. Buna rəğmən, mübarizə aparmalı və yaxşı nəticələr qazanacağımıza inanmalıyıq. Millimizin oyundan-oyuna "artıracağını" düşünürəm.

- Canni de Byaziylə müqavilə müddəti uzadıldı. Səncə, yerli məşqçinin gətirilməsi daha yaxşı olmazdı?
- İtaliyalı mütəxəssisi yola salsaydılar, yerinə yerli məşqçiyə şans verilməsi daha məntiqli olardı. Amma De Byazi postunda saxlanılıbsa, ona dəstək olmaq və yaxşı nəticələr qazanacağına ümid etməliyik.

ABDULLA İSMAYILOĞLU