Olimpiya çempionu, əfsanəvi çexiyalı qolkiper Dominik Qaşek bildirib ki, rusiyalı oyunçuların Milli Hokkey Liqası komandalarının Avropadakı sərgi oyunlarında iştirakını əngəlləməyə çalışacaq: “Əminəm ki, oktyabrda Praqada keçiriləcək oyunlarda rusiyalı hokkeyçilər olmamalıdı”.

Oktyabrın 7-8-də Praqada “San-Xose” və “Neşvill” sərgi oyunları keçirməlidi. “Akulalar”ın heyətində hücumçu Aleksandr Barabanov və müdafiəçi Nikolay Knıjkov çıxış edir, Yevgeni Sveçnikov isə baxışdadı. “Predatorz”un heyətində isə ruslardan hücumçu Yakov Trenin buz üzərinə çıxa bilər.
Qaşekin dediyinə görə, hazırda Çexiya Xarici İşlər Nazirliyi (XİN) ilə bu məsələ üzərində çalışır:

“XİN məndən oktyabrın 7-8-də Praqada oynaya biləcək, MHL klublarının heyətində çıxış edən rusiyalı oyunçuların adlarını, həmçinin MHL rəhbərliyinin əlaqə telefonlarını istəyib. İrəlidə çox iş var, ancaq biz buna çalışırıq”.

Maraqlıdı ki, Qaşek bir müddət əvvəl Rusiyada oynamağa yollanan çexiyalı hokkeyçilərə münasibətdə sanksiya tətbiqini də istəmişdi. Bir sözlə, bu adamın rusları görən gözü yoxdu. Öz aramızdı, kimin var ki?!