“Böyük şəhərin tək komandası”... Bəlkə də dünənə qədər belə idi.

Sumqayıtlılar “kimyaçılar”la fəxr edirdilər, şəhərin futbolsevərləri komandalarının hər oyununa böyük fəxarət hissi ilə gəlirdilər. Ancaq Aleksey Baqanın gəlişi, onun “sükan arxasına” keçməsi hər şeyi 180 dərəcə dəyişib. Artıq “Kapital Bank Arena”ya gələn azarkeş də rəqibin Sumqayıtdan 3 xalla dönməsini arzulayır ki, belaruslu mütəxəssis “böyük şəhərin tək komandası”ndan getsin, özünə başqa yerdə yurd-yuva qursun. Bu sözlər ürəkdən “kimyaçılar”a azarkeşlik edən, komandanın uğur qazanmasını istəyən əsl futbol azarkeşlərinə aiddi. Daha bir dönərə, 35 qəpiklik suya satılan, sifarişlə hər uğursuz matçdan sonra “Baqa”, “Riad Rəfiyev”, “ən böyük başqan bizim başqan qışqıran” Sənan Mirzəyevin rəhbərlik etdiyi “Sumqayıt”ın muzdlu rəsmi fanklubuna yox. Təsəvvür edin ki, 5 tur qola həsrət qalan, bəlkə də tarixinin ən bərbad durumunu yaşayan komandanın futbolçuları özləri-özlərindən utanırlar, ancaq ucuz dönərə, 35 qəpiklik qazsız suya özünü satan Sənan bəyin “muzdlu ordusu” hələ də yararsız legionerləri, “Neftçi” ilə oyundan sonra özündə güc tapıb jurnalistlər qarşısına çıxmaqdan qorxan baş məşqçini alqışla yola salır... Belə azarkeşə necə “əhsən” deyəsən?

Baqadan söz düşmüşkən, “kimyaçılar”ın belaruslu baş məşqçisində bir qədər abır-həya olsaydı, “Neftçi” ilə qarşılaşmadan sonra qorxaq kimi mətbuat konfransından yayınmaq əvəzinə media qarşısına çıxıb “istefa verirəm, məşqçi kimi komandanı yeni mərhələyə çıxara bilmədim” söyləyərdi. Ancaq Lukaşenkonun həmyerlisi səhhətini bəhanə edib kameralar, mikrafonlar və bir də “sən bura nəyə gəlmisən” sualından qaçdı. Qaçdı ki, baş məşqçi kreslosunda əyləşməyinin müddətini bir qədər də uzatsın. Uzatsın ki, ayda 5 min dollarını alsın, xanımı Gimnastika Federasiyasından əlavə, daha çox maaş alsın.

“Böyük şəhərin tək komandası”ının veteranlarının da ağzına su alıb oturması, gəncəli veternlardan fərqli yaşananlarla barışması təəccüblüdü. Ötən yay avrokuboklarda çıxışı edən kollektivin qısa vaxtda bu vəziyyətə düşməsində sumqayıtlı veteranların da məsuliyyəti az deyil. Onlar heç nə olmayıbmış kimi indiki durumla barışıb səslərini çıxarmırlar.

Yeri gəlmişkən, “Neftçi” ilə matçdan sonra Baqa mətbuat konfransına çıxmağa özündə cəsarət tapmayınca, Rail Məlikov özünü “qurbanlıq qoyun” etməyi lazım bildi. Rail bəyə futbol oynadığı dönəmdə böyük hörmətim var idi. Təəssüf ki, hər şeyi keşmiş zamanda qeyd etməyə məcburam. Nə üçün? Çünki bəndənizin “Sumqayıt” nəyə görə adətinə xilaf çıxaraq bu gün 5-li müdafiə oynadı” sualına tapşırıqla “kimyaçılar”ın məşqçilər korpusunda yer alan “professor” “kim deyir ki, biz 5-li müdafiə ilə oynadıq” cavabını verdi, hələ polemikaya girişdi. Tapşırıqla məşqçi olmaq istəyən Məlikov hələ də bilmir ki, 3-5-2 sxemi, elə 5-3-2 deməkdi. Yəni komanda hücum edəndə bu düzülüş 3-5-2 olursa, müdafiə olunanda avtomatik 5-3-2-yə çevrilir. Bu yerdə özünü “professor” sayan Məlikova sual vermək istəyirəm. 3 stopperlə sənin komandan necə müdafiə oluna bilər? İmkan olsa, klub rəhbərliyi məndən xəbərsiz məşqçilər korpusunda tapşırıqla yer alan veteran futbolçuya bu sualı versin. Verməsə, “Şamaxı” ilə görüşdə özüm bu sualı mətbuat konfransında “Sumqayıt” adından danışan məşqçiyə verəcəm.

P.S. Bir şəhərdə ölkə çempionu olmuş baş məşqçi varsa, nəyə görə “böyük şəhərin tək komandası”na kənardan məşqçi axtarmalısan? Yəqin ki, klub rəhbərliyi Samir Abasovu yaddan çıxarmayıb...

RƏŞAD