Tanınmış şirkət “Neftçi”dən bir ay vaxt istəyib
"Neftçi"nin ev oyunlarını keçirdiyi "Bakcell Arena" təmirə bağlanıb.
Məlumatı PFL-in rəsmi saytı yayıb. "Ağ-qaralar" arenanın ot örtüyündə yenilənmə işləri ilə bağlı quruma müraciət edib. “Səbail”in razılığı ilə 1-ci dövrənin 7-ci turunun oyunu “Səbail” – “Neftçi”, 2-ci dövrənin 15-ci turunun görüşü isə “Neftçi” – “Səbail” olaraq dəyişdirilib.
Ötən mövsümün sonlarında “Bakcell Arena” uzun müddətə təmirə bağlanmışdı. “Aqrosport” şirkəti klubdan 3 ay vaxt istəmişdi ki, arenanın ot örtüyünü qaydaya salsın. Burda əsas məsələ Konfrans Liqasının oyunları zamanı problemin olmaması idi. Lakin turnirin ikinci təsnifat mərhələsindən gördük ki, ot örtüyü bərbad haldadı. Bunun səbəbi nədi? Nə üçün stadion yenə təmirə bağlanır? “Aqrosport” kluba probleminin səbəbini necə izah edib?
Bu sualların cavabını “Neftçi”nin Media, Marketinq və İctimaiyyətlə Əlaqələr Departamentinin rəhbəri Rüstəm Allahverdiyevdən soruşduq: “Ötən mövsüm “Bakcell Arena”ya nəzarət edən “Aqrosport” şirkəti kluba müraciət etdi ki, ot örtüyünün dəyişdirilməsi ilə bağlı bizə 3 ay müddət lazımdı. Biz də bununla bağlı səfər oyunlarımızı evdə, doğma meydandakı matçlarımızı isə rəqib meydanlarında keçirdik. İstəyirdik ki, Konfrans Liqasının oyunlarına kimi stadion istədiyimiz səviyyədə olsun. Bu müddət ərzində arenada bərpa işləri görüldü, yeni toxum əkildi. Lakin Konfrans Liqasının oyunları zamanı hamı gördü ki, ot örtüyü istənilən səviyyədə deyil. Hətta çox pis vəziyyətdə idi. Bunun düzəldilməsi üçün şirkət bir müddət çalışdı. Lakin sonradan bildirdilər ki, havalar isti keçir, Bakı küləklər şəhəridi. Bu səbəbdən də yeni əkilən toxumlara mikrob düşüb. Bununla bağlı daha bir ay vaxt lazımdı. Biz də milli fasiləni, 2 oyunun səfərdə, 1 görüşün isə evdə olduğunu nəzərə alıb, “Səbail”ə müraciət edərək yerdəyişmə etdik. Şirkətin istədiyi 1 aylıq möhləti onlara verdik ki, problem yoluna qoyulsun”.
İLKİN SULTANLI
Digər xəbərlər
