“Turan Tovuz” – “Qarabağ” qarşılaşmasının təxirə salındığı turda bütün diqqətlər əvvəlki iki matçda maksimum nəticə göstərən “Sabah”la “Neftçi”nin oyununa yönəlmişdi.

İlk hissəsi maraqlı alınan görüşdə üstünlüyün hansı komandada olduğunu söyləmək çətin idi. Hər iki komanda sürətli hücumlar qurur, meydanın mərkəzində ləngiməyərək, topu qısa vaxtda rəqibin cərimə meydançasına çatdırmağı düşünürdü. İlk hissənin ortalarında meydan sahibləri hesabda önə çıxa bilərdi. Ancaq Sebalyos penaltidən yararlana bilmədi. “Ağ-qaralar”ın qapıçısı Brkiç ayaqları ilə zərbəni zərələşdirdi. Fasilə ərəfəsində isə qonaqlar hesabı açmağa müvəffəq oldu. Fasiləyə qolla yollanan “Neftçi”nin ikinci 45 dəqiqədə daha inamlı təsir bağışlayacağını düşünmək olardı. Ancaq Murad Musayevin komandası psixoloji sarsıntıdan tez özünə gəldi. İkinci hissədə təzyiqi bir qədər də artıran meydan sahibləri qonaq müdafiəçilərin yersiz kobudluğu sayəsində iki dəfə penalti vurmaq hüququ qazandılar ki, Sebalyosdan fərqli, Aleksey İsayev və yeni transfer Apeh şansı boşa vermədi. Bu qələbə sayəsində “ağ-göylər” (bu dəfə meydana qara-çəhrayı formada çıxmışdılar) 3 oyundan maksumum xal toplamaqla turnir cədvəlində “Qəbələ” ilə şərikli lider oldu.

Elmar Baxşıyevin “Qəbələ”si isə məlum səbəbdən Qəbələdə “Kəpəz”in qonağı idi. Yaşar Vahabzadənin komandası premyer-liqadakı üçüncü oyununda da meydanı məğlub tərk etdi. Demək olmaz ki, gəncəlilər Qəbələdə “qapazaltı” təsiri bağışladı. Sadəcə, “Qəbələ” yaxaladığı şanslardan maksimum yararlandığı halda, “Kəpəz” yüzfaizlik qol imkanlarını boşa verdi. Vahabzadənin komandası barədə qısaca bunu demək olar: bəsit qollara üzülüb, qol vurmada çətinlik çəkən kollektiv. Çempionatın autsayderinin müdafiə və qapı xətti çox zəif təsir bağışlayır. Arxa xətti inamsız olan komanda isə irəlidə nə qədər “dişli” olsa da, sonda məğlubiyyətlə barışmalıdı. “Kəpəz”in 3 matçda qapısında 10 qol görməsi də dediklərimizə bariz sübutdu.

Tura ötən həftənin cümə günü Şamaxıda start verildi. Bölgənin eyniadlı komandası “Səbail”lə üz-üzə gəldi. Heyətində çox sayda legionerin olduğu qonaqların yalnız yerli futbolçulardan qurulan “Şamaxı” ilə qarşılaşması matça maraq qatan məqamlardan idi. İlk iki turda xala həsrət qalan “şirlər”in Mahmud Qurbanovun komandasına qarşı oyunu, sona qədər mübarizə aparması yaxşı mənada çoxlarını təəccübləndirdi. Və bunun qarşılığında bölgə təmsilçisi mövsümdə ilk xalını qazandı. Mahmud bəyin gəlişindən sonra heyəti yetərincə dəyişən “dənizçilər”in potensialı daha artığına imkan versə də, hələ ki paytaxt təmsilçisi gözləntiləri doğrultmur.

Və turun son qarşılaşması. “Zirə”nin ev oyunlarını keçirdiyi arenada təmir işləri getdiyindən “qartallar” “Sumqayıt”ı da “Dalğa Arena”da qonaq edirdi. İlk dəqiqələrdən təşəbbüsü ələ alan Rəşad Sadıqovun komandası çox çalışsa da, böyük qüvvə ilə müdafiə olunan “kimyaçılar”ın qapısına yol tapa bilmədi. Aleksey Baqa mövsümdə ilk xalını qzandığına görə qapıçı Aydın Bayramova və Vurğun Hüseynova minnətdar olmalıdı. Məhz adını çəkdiyimiz futbolçular dəfələrlə qonaqları real qoldan xilas etdi.

Misli premyer-liqası
1-ci dövrə, 3-cü tur
19 avqust
Şamaxı – Səbail 1:1

20 avqust
Sabah – Neftçi 2:1

21 avqust
Kəpəz – Qəbələ 0:3
Zirə - Sumqayıt 0:0

1. Qəbələ 3 3 0 0 8-1 9
2. Sabah 3 3 0 0 8-2 9
3. Qarabağ 2 2 0 0 5-1 6
4. Neftçi 3 2 0 1 7-4 6
5. Zirə 3 1 1 1 3-4 4
6. Turan Tovuz 2 1 0 1 1-2 3
7. Səbail 3 0 1 2 2-5 1
8. Şamaxı 3 0 1 2 2-5 1
9. Sumqayıt 3 0 1 2 0-5 1
10. Kəpəz 3 0 0 3 3-10 0

Bombardirlər: Coy-Lens Mikels (Sabah), Ramil Şeydayev, Musa Qurbanlı (hər ikisi "Qarabağ"), Sərtan Taşkın (Zirə), Amil Yunanov (Şamaxı), Rövlan Muradov (Qəbələ) – 2.

Növbəti turun oyunları: 26 avqust – Neftçi – Zirə, Sumqayıt – Turan Tovuz; 27 avqust – Qarabağ – Şamaxı, Səbail – Kəpəz; 28 avqust - Qəbələ - Sabah.

RƏŞAD