22 İyul - Milli Mətbuat Gününə həsr olunan jurnalistlər arasında şahmat üzrə komanda yarışına yekun vurulub. Azərbaycan Şahmat Federasiyasının təşkilatçılığı və “Azərlotereya”nın baş sponsorluğu ilə keçirilən turnirin final mərhələsi maraqlı mübarizə şəraitində keçib. Belə ki, 1/4 finalda “FutbolTrend” komandası (Faiq Tahirov, Vüqar Vüqarlı) “Siciliya müdafiəsi”nə (İlkin Vidadioğlu, İbrahim Məmmədov) qalib gəlməklə yarımfinala adlayıb. B qrupunun lideri “Qoallisimo” (Aysel Adıgözəlli, Səddam Laçın) 1/4 finalda digər qrupda 4-cü yeri tutan “Veni Vidi Vici”ni (Seymur Teymurov, Vüqar Məmmədov) üstələyib. Digər oyunda Murad Əliyevlə Seymur Baxşıyevdən ibarət “Master” komandası “Ağ-qara”nı təmsil edən Sərxan Musalı-İman Məcidov duetinə uduzmaqla mübarizəni dayandırıb.
1/4 finalda ən gərgin oyun “Firavan” (Pünhan Şükür, Bəxtiyar Məcidli) və “Savalan” (Elmidar Əliyev, Samirə Allahverdiyeva) arasında yaşanıb. Samirə Allahverdiyeva yarışda iştirak edə bilmədiyinə görə Elmidar Əliyev mübarizəni tək davam etdirib. Qaydalara əsasən oyuna 0:1 geridə başlayan (ikinci lövhədə komanda yoldaşı olmadığına görə məğlubiyyət hesablanıb) Elmidar Əliyev həm ağlarla, həm də qaralarla partiyanı udmaqla cütün taleyini armageddona daşıyıb. Püşkə əsasən qara fiqurları seçən Əliyev növbəti qələbə ilə yarımfinalda iştirak hüququ qazanıb.
Yarımfinalda “Qoallisimo” iddialı “Ağ qara” ilə üz-üzə gəlib. İki oyundan sonra ümumi hesab bərabər olduğundan mübarizə armageddonda davam edib. Burda qara fiqurları seçən “Qoallisimo” birinci lövhədə qazanılan qələbə sayəsində finala adlayıb. Digər yarımfinalda “FutbolTrend” dueti “Savalan”ı təkbaşına təmsil edən Elmidar Əliyevi gərgin mübarizənin sonunda məğlub etməyi bacarıb.
3-cü yer uğrunda görüşdə “Ağ-qara” komandası “Savalan”dan güclü olub. Sərxan Musalı həlledici görüşdə həmkarı Elmidar Əliyevi üstələməklə komandasına üçüncülük qazandırıb. Finalda isə “Qoallisimo” güclü “FutbolTrend”ə qalib gəlib. İki oyundan sonra ümumi hesab bərabər olduğundan mübarizə armageddonda başa çatıb. Burada qara fiqurları seçən “Qoallisimo”nın birinci lövhəsində Aysel Adıgözəlli həmkarı Faiq Tahirovu məğlub etməklə komandasının 1-ci yeri tutmasında önəmli rol oynayıb.
Beləliklə, “Ağ qara” komandasının üzvləri Sərxan Musalı və İman Məcidov turniri 3-cü yerdə başa vurub. Faiq Tahirov və Vüqar İmanov yalnız finalda uduzmaqla ikinci olub. “Qoallisimo” komandasını təmsil edən Aysel Adıgözəlli və Səddam Laçın yarışın qalibi adını qazanıb. Yaxın günlərdə keçiriləcək bağlanış mərasimində ilk üç yeri tutan komandalara pul mükafatı, sponsorlardan qiymətli hədiyyələr və diplom təqdim olunacaq. Eyni zamanda bağlanış mərasimində Təşkilat Komitəsi xüsusi nominasiyalar üzrə qalibləri elan edəcək.