Srağagün Şamaxı şəhər stadionunda eyniadlı komanda "Turan Tovuz"la yoxlama oyunu keçirdi. Bu oyunla bağlı maraqlı məqamlardan biri stadiona girişin pullu olmasıydı. Belə ki, biletin qiyməti 3 manat idi. “Zirə”nin Konfrans Liqasındakı oyununa bilet 2 manata satıldığı halda, yoldaşlıq oyunu üçün girişin 3 manat olması sosial şəbəkələrdə maraqlı reaksiya, daha dəqiqi, gülüş və ironiya doğurmuşdu. "Football-plus.az" saytı olaraq, stadiona nə qədər azarkeşin gəldiyini öyrənmək üçün "Şamaxı"nın meneceri Kamran İsmayılovla əlaqə saxladıq: "Turan Tovuzla oyunda stadiona girişi pullu etməyimizi bəzi şəxslər, o cümlədən bir qrup idman saytı aqressivlik və qınaq ilə qarşıladı. Burda nəyi ayıb etdiyimizi bilmirik. Stadiona 50-60 dəvət olunan qonaqdan başqa 1000-1500 azarkeş təşrif buyurdu. Yəni matça girişin pullu olmasına görə kimsə nə klubu qınadı, nə də qiymətdən şikayətləndi. Bu məqam bir daha onu göstərir ki, Şamaxıda futbola maraq var və azarkeşlərimiz gələcəkdə də bizi tək qoymayacaq".
Kamran bəy ölkə çempionatında da "Şamaxı"nın matçlarına girişin pullu olacağını vurğuladı: "Birmənalı şəkildə komandanın ev oyunlarına giriş pullu olacaq. Ötən mövsüm Şamaxıda cəmi iki ev oyunu keçirməyimizə baxmayaraq, stadion, demək olar ki, ağzına kimi dolu idi. Həm ötən mövsüm, həm də Tovuz təmsilçisiylə oyunda stadiona azarkeşlərin axın etməsi bizi inandırır ki, gələcəkdə də seyrcilər komandaya dəstək üçün stadiona təşrif buyuracaqlar. Əyalət klubları ilə iş baxımından yetərincə təcrübəm var. "Şəmkir"də və "Simurq"da çalışdığım vaxt camaatın necə böyük həvəs-coşquyla arenaları doldurduğunu görmüşəm. İnanıram ki, Şamaxı sakinləri də böyük coşqu ilə komandamızı tək buraxmayacaq və daim 12-ci oyunçu kimi dəstəyini bizdən əsirgəməyəcək".
ABDULLA İSMAYILOĞLU