Zəki Çəliklə dördillik müqavilə imzalayan Joze Mourinyonun ''Roma''sı indi də gözünü başqa bir türk oyunçuya dikib.

Football-plus.az xəbər verir ki, Konfrans Liqasının qalibi olan paytaxt təmsilçisi ''Trabzonspor''un liderlərindən sayılan Abdülkadir Ömürə ciddi maraq göstərir. Əslində 23 yaşlı vinger üçün ''Marsel'' daha çox dəridən-qabıqdan çıxır. Baş məşqçi postuna İqor Tudoru gətirən Fransa təmsilçisi Abdülkadir üçün 12 milyon avro ödəməyə hazırdı. Amma ''Marsel''in bu təklifinin ardından araya ''Roma''nın girməsi məsələni qəlizləşdirib.

''Trabzonspor'' rəhbərliyi qərarı Abdülkadirin özünün verməsini istəyir. O isə Mourinyonun başçılığı altında daha çox inkişaf edəcəyinə inandığı üçün İtaliyaya yollanmağın tərəfdarıdı. Bu üzdən superliqanın son çempionu romalılardan rəsmi təklif gözləyir. Türkiyə mətbuatının yazdığına inansaq, ''Trabzonspor'' ''Roma''dan ''Marsel''in təklif etdiyi məbləği, yəni 12 milyon avro tələb edir. Amma Mourinyonun komandası hələ rəsmi təklif irəli sürməyib və hadisələrin axarını izləyir.

Qeyd edək ki, Türkiyə yığmasının üzvü olan Abdülkadir ötən mövsüm superliqada meydana çıxdığı 33 matçda 7 qol, 4 məhsuldar ötürməlik performans sərgiləyərək tarixi çempionluqda mühüm rol oynayan futbolçulardan biri olmuşdu. ''Bordo-mavililər''lə hələ ikiillik müqaviləsi olan istedadlı futbolçunun indiki transfer dəyəri təxminən 10-11 milyon avrodu.