Divizion klubunda iranlı hücumçu - AÇIQLAMA
Növbəti mövsümdən 1-ci divizionda mübarizə aparacaq "Araz-Naxçıvan" heyəti gücləndirməklə məşğuldu.
"Football-plus.az" saytı olaraq komandanın hazırlığı, transfer çalışmaları ilə bağlı baş məşqçi Azər Bağırovla əlaqə saxladıq:
"Hazırlıq öz axarında davam edir. Baxışa xeyli futbolçu dəvət etmişik, əsasən 2002-03-cü il təvəllüdlü gənclərə üstünlük veririk. 23 yaşlı Ege Atlanla razılığa gəlmişik. Ucaboy müdafiəçinin gücümüzə güc qatacağını düşünürəm. Türk futbolçu bir müddət Azərbaycan pasportuna da sahib idi, amma hazırda Türkiyə vətəndaşı olduğundan legioner sayılır. Gələcəkdə onu millimizə qazandırmağı düşünürük. 26 yaşlı iranlı hücumçu Zöhrab Fəxrəbadini isə sınaqdan keçiririk. 1,86 m boya sahib forvard həm sağ, həm də sol ayağı ilə oynaya bilir. İranın "Persopol", "Atrak Bojnourd", "Payam Toos" klublarında çıxış edib. Həmçinin "Sabah"ın gənc futbolçularla bağlı qərarını gözləyirik. İki nəfəri sıralarımıza qatmışıq, daha bir neçəsini cəlb etməyi düşünürük. Ümumiyyətlə, gənc və perspektivli futbolçuların axtarışını davam etdirəcəyik".
ABDULLA İSMAYILOĞLU
Digər xəbərlər
