Qəzetimizin ötən sayında “Formula-1” yarışlarının üçqat qalibi Nelson Pikenin Lüis Hemiltonla Maks Ferstappen arasındakı toqquşmanı şərh edərkən britaniyalı pilot haqda “neqinyo” ifadəsini işlətdiyini, bunun isə dünyada irqi təhqir kimi qəbul olunduğunu xəbər vermişdik.

69 yaşlı braziliyalı buna görə Hemiltondan üzr istəməyi lazım bilib:

Üzrxahlığa baxmayaraq, Pike paddokda olmaq hüququnu itirəcək. Bu iddia ilə BBC çıxış edib. Beynəlxalq Avtoidman Federasiyası (FIA) Hemiltonla bağlı ifadəyə görə onu belə cəzalandırıb.

Hemiltonla bağlı başqa cəlbedici xəbər də var. Onunla FIA arasındakı münaqişə son həddə çatmaqdadı. Mayın əvvəlində keçirilən Mayami “Qran-pri”sində britaniyalını qurumun qaydalarına əməl etməyə və bəzək əşyalarını çıxarmağa məcbur etmişdilər. Lüis sırğalardan qurtulsa da, burnundakı pirsinqi çıxarmaqdan boyun qaçırmış, bunun, sadəcə, mümkünsüz olduğunu demişdi. FIA ona problemi həll etmək üçün vaxt vermişdi. İyunun 30-da həmin möhlət də bitdi. Lüisin dünənki Silverstoun məşqinə pirsinqlə çıxıb-çıxmayacağı maraqla gözlənilirdi. Ünlü pilot pirsinqdən qurtulmasaydı, Böyük Britaniya mərhələsində iştirakına qadağa qoyula bilərmiş.

Hemilton artıq dəfələrlə bu qaydaya əməl etməyə hazır olmadığını, pirsinqi yalnız mövsümlərarası dövrdə çıxaracağını bildirib. FIA da mövqeyindən geri çəkilmirdi. Qurumun prezidenti Məhəmməd bin Sulayemin iddiasına görə, zərgərlik məhsullarına münasibətdə əvvəllər əməl olunmayan qadağa pilotların təhlükəsizliyi baxımından vacib məsələdi. Reqlamentdə qadağa bəndi 20 ildən artıqdı mövcuddu, ancaq qurumun əvvəlki rəhbərləri buna göz yumublar. Bin Sulayem deyir ki, iş yeddiqat dünya çempionunun diskvalifikasiyasına qədər uzana bilər. Hərçənd onun məhz qarşıdakı həftəsonunda belə sərt cəzaya əl atması inanılmaz idi. Çox güman, münaqişə 37 yaşlı britaniyalının cərimələnməsi və ya ona xəbərdarlıq olunması ilə bitəcək.

Axı Silverstoun Hemiltonun ev trassıdı. O, “doğma divarlar” arasında 8 dəfə qalib gəlib ki, bu da mütləq rekorddu (Cim Klark və Alen Prostun burda 5 qələbəsi var). Məhz Hemiltona görə tribuanalara 100 minə yaxın adam toplaşır, ünlü pilot birmənalı şəkildə yerli publikanın sevimlisidi.

Pandemiyadan sonra qadağalar qalxdıqca müxtəlif sahələrdə nəinki əvvəlki rəqəmlərə qayıtmaq, hətta rekord göstəricilərə nail olmaq adi hal alıb. Bunu “Formula-1” həvəskarlarına da aid etmək olar – onlar bir (bəzi ölkələrdə iki) illik tribuna qadağasının əvəzini çıxırlar. Belə ki, Britaniya “Qran-pri”sinin təşkilatçıları həftəsonu boyunca avtodromu 400 min azarkeşin ziyarət edəcəyini gözləyir. Bilet satışının axarı da belə gözləntinin boşuna olmadığını göstərir. Xatırladaq ki, burdakı ötənilki yarışı üç gün ərzində 336 min azarkeş izləmişdi.