“ASCO Arena” nə vaxt təhvil veriləcək?
"Səbail"in ev oyunlarını keçirdiyi "ASCO Arena"da süni örtüyün yenisi ilə dəyişdirilməsi işlərinə start verilib.
Son mövsümdə premyer-liqada çıxış edən bütün klubların baş məşqçilərinin şikayətçi olduğu qazonun yenilənməsi Azərbaycan futbolu üçün irəliyə addımdı. Görəsən, arenadakı təmir işləri nə vaxt bitəcək? Hazırda proses necə gedir?
Bu suallara cavab tapmaq üçün AFFA-nın baş katibinin müavini Kamran Vəliyevlə əlaqə saxladıq. Onun “Football-plus.az” saytına açıqlaması belə oldu:
“Təmir işləri hazırda davam edir. Süni örtük söküləndən sonra baxılır, onun altında bəzi yerlərdə müəyyən çökmələr ola bilər. Stadion da düz olmalıdı. Bu problemlər aradan qaldırılır deyə, təxminən iyunun sonunda işlərin təhvil verilməsi nəzərdə tutulur. Burda hava da iş prosesinə təsir edir. Yəni stadionun hazır olması ordakı vəziyyətdən asılıdı. Ona görə dəqiq tarix deyə bilmirik. Amma ən geci iyulun birinci həftəsində bütün işlər yekunlaşdırılacaq”.
Maraqlıdı, yeni örtük beynəlxalq standartlara cavab verəcək səviyyədədi? Kamran Vəliyevi eşidək:
“40 mm hündürlükdə olan ən yeni nəsil örtükdü. Türkiyə istehsalıdı. İşlər bitəndən sonra FİFA test edib sertifikatlaşdıracaq. Çünki FİFA-nın sertifikatını ala bilməsək, beynəlxalq oyunlar keçirə bilmərik. İşlərə başlanılarkən tələb olaraq o qoyulmuşdu ki, sonda FİFA-nın ən yüksək sertifikatı olan “Quality Pro”nu alaq. Örtük lazımi səviyyədədi və tələb olunan sertifikatı alacaq keyfiyyətdədi”.
ŞAİR ABDULLA
Digər xəbərlər
