Son mövsümdə 11 illik fasilədən sonra İtaliya çempionluğunu qazanan “Milan”ın artıq yeni sahibləri var.

Xəbər verdiyimiz kimi, Amerikanın “RedBird Capital” investisiya şirkəti son illər ərzində klubun işləri ilə məşğul olan “Elliott Advisors” fondu ilə “rossonyeri”nin satışını razılaşdırıb. Artıq bu yöndə hansısa sual qalmayıb. Sövdələşmə məbləği 1,2 milyard avrodu. “Elliott” özündə minoritar səhm paketi saxlayacaq, bir də fond Direktorlar Şurasındakı yerini qoruyacaq.

Xatırladaq ki, “Elliott” “Milan”a 2018-ci ildən bəri nəzarət edirdi. Klubun əvvəlki sahibi, çinli biznesmen Yonhon Li fonddan götürdüyü istiqrazları qaytara bilmədiyinə və “qırmızı-qaralar”ı müflislik həddinə çatdırdığına görə idarəçilikdən uzaqlaşmalı olmuşdu. Əməliyyat itkiləri 560 milyon avro təşkil edirdi. Fondun idarəçiliyi dövründə qənaət rejimi işə salındı, “Milan” əlində olan pulla yaşamağa məcbur idi. Məhz bu üzdən Canluici Donnarumma, Hakan Çalxanoğlu və Frank Kessye ilə müqavilə müddətini uzatmaq alınmadı. Əvəzində maliyyə itkiləri get-gedə azalmağa başladı və “La Gazzetta dello Sport”un informasiyasına inansaq, 2020/21 mövsümündə cəmi 60 milyon avro təşkil etdi.

“Elliott”da onu da gizlətmirdilər ki, işləri qaydaya salandan sonra kluba yeni sahib tapacaqlarına ümid edirlər. Aprelin sonunda Bəhreynin nəhəng investisiya fondu “Investcorp”un kluba sahiblik edə biləcəyi ilə bağlı informasiyalar yayıldı. Mümkün sövdələşmənin dəyəri 1,1 milyard avro göstərilirdi. Belədə Yaxın Şərqin adı çəkilən ölkəsi də BƏƏ, Qətər və Səudiyyə Ərəbistanının ardından Avropadan futbol klubunu mülkiyyətinə keçirəcəkdi. “La Gazzetta dello Sport” onu da yazırdı ki, bəhreynlilər elə bu yay transferlərə 300 milyon avro ayırmaq fikrindədi. Ancaq son nəticədə “Investcorp” variantı alınmadı. “Elliott” “RedBird Capital” ilə sövdələşməyə getdi.

“RedBird Capital”ın yaradıcısı və idarəedicisi Cerri Kardinale deyir:

Bütün bu tarixçədə iki cəlbedici məqam var. Birinci məqam budu ki, “RedBird Capital” təxminən bir il əvvəl “Liverpul”un (bundan başqa, “Boston Red Soks” beysbol klubunun da) sahibi olan “Fenway Sports Group” şirkətinin səhmlərinin 10 faizini alıb. Belədə maraqların toqquşması məsələsi yaranır. Ancaq “Fenway Sports Group” şirkətinin səhmləri passiv investisiyadı. “RedBird” İngiltərə klubunun idarəçiliyində hansısa şəkildə iştirak etmir, “qırmızılar”ın Direktorlar Şurasında şirkətin heç bir təmsilçisi yoxdu. Odu ki, UEFA-nın “Milan”la “Liverpul”un Çempionlar Liqasında mübarizə aparmasıyla bağlı etiraz etmək haqqı yoxdu. Üstəlik qitə futbol qurumu zamanında bundan da mürəkkəb görünən, birmənalı sayılmayan “Leyptsiq” – “Zaltsburq” münasibətlərini araşdıraraq heç bir əsas tapmamışdı.

İkinci məqam: Avropanın daha bir klubu ABŞ-dan olan sahiblərin nəzarəti altına keçir. “Milan”la bağlı tarixçədən bir neçə gün əvvəl “Çelsi”nin ABŞ-dan olan biznesmen Tod Boelinin rəhbərlik etdiyi konsorsiuma satışı həyata keçirilib. “Liverpul” haqda yuxarıda danışdıq. “Mançester Yunayted” Qleyzerlər ailəsinin, İngiltərənin digər nəhəngi “Arsenal” Sten Krenkenin nəzarətindədi. “Kristal Pelas”la “Bernli”nin sahibləri da amerikalılardı, okeanın o tayından olanlar həmçinin “Lids” və “Aston Villa”da səhmlər paketinə malikdi.

“Milan”ın təmsil etdiyi İtaliyaya gəlincə, “Roma”, “Fiorentina”, “Atalanta” (səhmlərin 55 faizi), “Cenoa”, “Parma”, “Spetsiya” və “Venetsiya” da ABŞ-dan olan biznesmenlərinə nəzarəti altındadı. Fransada isə “Marsel” belə klubdu.