Birləşmiş Ərəb Əmirliklərində şahmat üzrə 5-ci beynəlxalq "Sharjah Masters" turniri davam edir.

"Football-plus.az" xəbər verir ki, yarışda bu gün beşinci turun görüşləri keçirilib. Azərbaycan təmsilçilərindən Məhəmməd Muradlı və Günay Məmmədzadə görüşlərini qələbə ilə başa vurub. Onlar, müvafiq olaraq, Nodirbek Yakubboyev (Özbəkistan) və Ammar Sedranini (BƏƏ) yenib.

Nicat Abasov Lukas Van Foreestlə (Niderland) heç-heçəyə razılaşıb.

Misrətdin İsgəndərov Nodirbek Abdusattorova (Özbəkistan), Aydın Süleymanlı Mamikon Qaribyana (Ermənistan) uduzub.

Qələbə sayəsində xalını 3,5-ə çatdıran Məhəmməd turnir cədvəlində 9-cu sıraya yüksəlib. Üç xala sahib Misrətdinlə Nicat, müvafiq olaraq, 14 və 26-cı yerlərdədirlər. Aydın və Günay isə hərəyə 1,5 xal hasil edə biliblər.

Lider 4,5 xalı olan hindistanlı Abhijeet Quptadı.

Turnirdə 32 ölkədən ümumilikdə 80 şahmatçı iştirak edir.

Qeyd edək ki, İsveçrə sistemi üzrə 9 turdan ibarət yarış mayın 29-da başa çatacaq.