Region Liqasının yarımfinalında “Cəbrayıl” “Qusar”la üz-üzə gələcək.

Həvəskar çempionata bu mövsüm maraq digər illərə nisbətən daha da artıb. Bunun əsas səbəbi yarışda mübarizə aparan bəzi komandaların böyük iddialarının olmasıdı.

Yarımfinalda çıxış edəcək 4 komanda bu mövsüm səs-küy doğurdu. Böyük maraqla gözlənilən matçlarda hansı komandaların üstün olduğunu demək çətindi. Lakin bir şeyi əminliklə deyə bilərik ki, bizi gərgin oyunlar gözləyir. Görəsən, “Cəbrayıl” görüş haqda hansı fikirdədi? Sualımızı komandanın baş məşqçisi Cavid Hüseynova ünvanladıq. Mütəxəssisin “Football-plus.az” saytına açıqlaması belə oldu:

“Qarşılaşma bizim üçün ciddi önəm daşıyır. Qalib gələn finala çıxacaq. Yarımfinala vəsiqə qazanan 4 komandanın hər biri çox güclüdü və finala layiqdi. Rəqabətin bu səviyyədə olması məni çox sevindirir. Maraqlı oyunlar olacaq. Bizi “Qusar”la rəqabətli qarşılaşma gözləyir. Matçın gərgin keçəcəyi indidən bəllidi”.
Hüseynov komandasının 1-ci divizionda iştirak etməsinə icazə verilməməsinin futbolçularına ciddi təsir etmədiyini də vurğuladı:
“Bu məsələnin oyunçulara heç bir təsiri yoxdu. Təbii ki, 1-ci divizionda çıxış etmək istəyərdilər. Ancaq bu klubun düşünəcəyi bir şeydi. Futbolçulara aidiyyatı yoxdu. Onlar verdiyimiz tapşırıqları meydanda yerinə yetirməlidilər. Vəzifələri bundan ibarətdi. Dediyim kimi, bu məsələ klub rəhbərliyini, məni düşündürə bilər, futbolçuları yox”.

SƏNƏM FƏRHADOVA