“AFFA 500 min verirsə, Tovuz camaatından da 1,5 milyon yığmaq olar” - AÇIQLAMA
Böyük ehtimalla növbəti mövsüm “Turan Tovuz” premyer-liqada iştirak edəcək. Klubun Muşahidə Şurasının sədri Oqtay Abdullayev qəzetimizə açıqlamasında bildirib ki, AFFA komanda üçün 500 min manat ayıracaq.
Bu xəbər mediada geniş müzakirəyə səbəb oldu. Görəsən, şəhərin iş adamları komandaya dəstək olacaq? Görünən budu ki, bu maliyyə “Turan Tovuz” üçün kifayət etməyəcək. İş adamlarının dəstəyi mütləqdi. Bəs bu olacaqmı? Qaranlıq məsələyə aydınlıq gətirmək üçün "Turan”ın sabiq icraçı direktor Yaşar Sultanov ilə əlaqə saxladıq. O, vaxtilə maliyyə məsələsinin həlli üçün AFFA-nın icraçı vitse-prezidenti Elxan Məmmədova müraciət etdiyini dilə gətirdi. “Əvvəlcə deyim ki, mən iş adamı olmamışam. Həmişə klubda idarə edən şəxs olmuşam. Bir neçə müddət idi ki, işsiz idim. Hazırda işə düzəlmişəm. Yəni biznesmen deyiləm. Amma Tovuz futbolu üçün mütərəqqi təklif vermişdik. O vaxt Vidadi müəllimlə birgə Elxan Məmmədovun qəbuluna getmişdik. “Turan Tovuz” Açıq Səhmdar Cəmiyyətidi. AFFA 500 min verirsə, düşünürəm ki, Tovuz camaatından da 1,5 milyon manat yığmaq olar. 5 manatdan tutmuş 500 minə kimi kimin ürəyi nə istəsə, komandaya dəstək olsun. Təbii ki, bu ödənişi edənlər xüsusi imtiyazlara sahib olacaqlar. Bəlkə kimsə daha çox maliyyə ayıracaq ki, klubun prezidenti olacam. Ola bilər, kimsə hər ay 15 manat köçürsün. Təsəvvür edin ki, minlərlə adam belə bir şey edir. Görün bu nə qədər böyük pul edir? Avropanın hər yerində belə klublar var. Onların əksəriyyəti səhmdar cəmiyyətlərdi. Həmin şəhərlərin hər biri öz komandalarını düşünür və onun hesabına müəyyən qədər maddi yardım edirlər. Təbii ki, futbola marağı da artıracaq. Çünki səhmi olan şəxs mütləq komandanın oyununa gələcək, qələbə qazanması üçün dəstək olacaq. Biz burda fərqli sistemlər tətbiq edə bilərik. Sadəcə, kimsə bunun yaranması üçün qərar verməlidi. “Turan Tovuz”un Açıq Səhmdar Cəmiyyət olmasına qərar verilsə, detalları həll etmək asandı. Düşünürəm ki, rayonun əksər insanları burda pay sahibi olacaq. Bu hazırda çətin prosesdi. Amma gələcək üçün ideal variantdı. Komandanın maliyyə dayaqları olur. Klub rayon camaatının hesabına ayaqda duracaq. Təbii ki, daha sonra sponsorların cəlb edilməsinə başlanılacaq. Çünki Tovuzda futbol sevilir. Hamı komandanın uğur qazanmasını istəyir. Yenə deyirəm, kluba dəstək olmaq üçün imkanım yoxdu. Amma idarəçilikdə və təşkilatçılıqda yardımçı ola bilərəm”.
İLKİN SULTANLI
Digər xəbərlər
