“Şamaxı”da Sənan Qurbanovun istefaya göndərilməsindən sonra əvəzedici komandanın çalışdırıcısı Rüstəm Əliyev baş məşqçi postuna gətirildi.

“Şamaxı -2”də isə bu vəzifə karyerasını yeni bitirən Rail Məlikova həvalə olundu.

Əliyevdən fərqli Məlikovun komandası 1-ci divizionda 2-ci pillədə qərarlaşıb. Gənc mütəxəssis yeni komandası ilə artıq 2 oyuna çıxıb. Debüt matçında “Turan Tovuz”a səfərdə 2:4 uduzan “Şamaxı-2” ötən gün “Səbail-2”yə 5:0 qalib gəldi. Divizionun sonuna isə 2 tur qalıb. Görəsən, “münəccimlər” gümüş medalçı olmağı bacaracaq? Komandada vəziyyət necədi? Suallarımızı Rail Məlikova ünvanladıq.
Gənc mütəxəssisin “Football-plus.az” saytına açıqlaması belə oldu:

“Düzdü, istəyərdim debüt oyununda qələbə qazanaq. Amma bu futboldu. Bilirdik ki, bizi çətin səfər matçı gözləyir. Bu amil sözünü dedi. Məğlub olmağımıza baxmayaraq, uşaqlardan razı qaldım. Verilən tapşırığı tam yerinə yetirməsələr də… Bunun səbəbi komandada yeni olmağımdı. Ona görə də anlaşılmazlıqlar ola bilər. İkinci qarşılaşmada isə bunlar aradan qalxdı. Tapşırıqların hamısına tam əməl etdilər və qələbə qazandıq. Qarşıda 2 oyunumuz qalıb. Maksimum nəticə gözləyirəm. Hazırda ikinci pillədəyik. Yerimizi itirmək istəmirik. Bu potensial komandamda var. Yaxşı futbolçulardı, aralarında gələcək vəd edənləri də var”

SƏNƏM FƏRHADOVA