"Gücümə inanıram" - ÖZƏL AÇIQLAMA
Premyer Liqanın 23-cu turu mühüm hadisə ilə yadda qaldı.
“Qarabağ” doğma meydanda “Şamaxı”nı 8 cavabsız qolla məğlub etdi. Oyunsonrası mətbuat konfransıda qonaqların baş məşqçisi Sənan Qurbanov istefa verdiyini bildirdi. Ertəsi gün isə klub “feysbuk”səhifəsində bununla bağlı paylaşdığı bəyanatda rəhbərliyin mütəxəssisin qərarını müzakirə etdiyini və istefasının qəbul olunduğunu ictiamiyyətin diqqətinə çatdırdı. Bundan əlavə, klub rəhbərliyinin digər qərarı ilə əsas komandanın baş məşqçisinin vəzifəsinin icrası Rüstəm Əliyevə, ikinci komandanın baş məşqçisinin vəzifəsinin icrası isə Rail Məlikova həvalə olundu. Qeyd edək ki, Rail Məlikov futbolçu karyerasını rəsmən ötən həftə keçirilən “Şamaxı” – “Neftçi” matçında başa vurub. Görəsən, o bu təyinatın bu qədər tez gerçəkləşəcəyini gözləyirdi?
Məsələ ilə bağlı sabiq futbolçunun fikirlərini öyrənməyə qərar verdik. Rail Məlikovun "Football-plus.az" saytına açıqlaması belə oldu:
“Təyinatıma səbəb əsas heyətdə baş məşqçi dəyişikliyi oldu. O vaxta qədər əsas komandada köməkçi-məşqçi kimi çalışırdım. Bu il də B kateqoriyasını aldım. 7 ay imtahanlar getdi və məşqçilik kateqoriyasını aldıqdan sonra Sənan müəllimin köməkçisi işlədim. Əvəzedicilərin baş məşqçisi Rüstəm müəllimin əsas komandaya təyinatından sonra onun yerinə də məni təyin etdilər. Bu mühüm vəzifəni mənə həvalə etdiyinə görə klub rəhbərliyinə, başda Zaur müəllim olmaqla minnətdarlığımı bildirirəm. Mənə güvəndiklərinə görə bu posta layiq bildilər. Açığı, bu vaxta qədər çox işləyib, üzərimizə düşən vəzifəni yerinə yetirirdik, məşqlər keçirdik. Hardansa başlamaq lazım idi. Bu da mənim üçün böyük bir fürsət oldu. Həm də 2-ci komandada baş məşqçi olmaq, açığı, gözlənilməz olsa da, buna hazırlaşırdım. Belə baxanda, ağır iş olmağına baxmayaraq, bu vəzifənin öhdəsindən layiqincə gəlməyə çalışacam. Gücümə inanıram, məşqçi heyətimə də güvənirəm. Futbolçuları da yaxşı tanıyıram. Bu uşaqlar həmişə gözümün qabağında olub. Bundan əvvəl də lazım olanda 2-ci komandanın heyətində onlarla birlikdə oynamışam. Komandaya da inanıram. Qarşıda 4 görüş var. Bu oyunlardan və ağır yükün altından layiqincə çıxmağa çalışacam”
SƏNƏM FƏRHADOVA
