"Komandamın oynadığı futboldan razı qaldım" - Millinin baş məşqçisi
Qadın futbolçulardan ibarət komandalar arasında dünya çempionatının seçmə mərhələsində keçirilmiş Danimarka - Azərbaycan oyunundan sonra milli komandamızın baş məşqçisi Siyasət Əsgərov fikirlərini bildirib.
Çalışdırıcı 0:2 hesabıyla başa çatan matçı belə şərh edib:
“Bosniya və Herseqovina komandası ilə müqayisədə Danimarka daha güclü rəqib idi. Bizi çox çətin oyun gözlədiyini bilirdik. Qrupumuzun məğlub olmayan lider komandasına qarşı oynadıq. Düzdü, 0:2 hesabı ilə məğlub olsaq da, komandamın oynadığı futboldan razı qaldım. Xüsusən verdiyimiz tapşırıqları yerinə yetirmək, xarakter nümayiş etdirmək baxımından, futbolçuların istəkli olmaları, sonadək mübarizə aparmaları məni qane etdi. Son iki oyunda qazandığımız təcrübə gələcək oyunlarında bizə çox faydalı olacaq. Məqsədimiz qarşıdakı iki oyundan xal və ya xallarla ayrılmaqdı".
Digər xəbərlər
