Rusiya prezidenti Vladimir Putin fevralın 24-ü səhər saatlarında “xüsusi əməliyyat” adı altında Ukraynaya hücum qərarı verməklə təkcə dünyanı silkələmədi, həm də futbol təsərrüfatında böyük başıpozuqluğa şərait yaratdı.

Mübaliğəsiz demək olar ki, Putinin işğal planına görə ən çox əziyyət çəkənlərdən biri “Çelsi”nin sahibi - yəhudi əsilli milyarder Roman Abramoviçdi. Bildiyiniz kimi, London klubunun təsisçisi “Fordstam Limited” şirkəti rusiyalı oliqarxa məxsusdu. Böyük Britaniya hökumətinin martın 10-da Abramoviçə sanksiya tətbiq etməsi ilə “zadəganlar”ın qara günləri başlayıb. Klub dərhal satışa çıxarılıb, londonluların transfer etməsinə və futbolçularla müqavilə müddətini uzatmasına, oyunlara bilet satmasına qadağa qoyulub.

Belədə adi məişət xərcləri üçün pul tapa bilməyən klub rəsmilərinin ah-naləsi axır ki hökumətə çatıb. Britaniya hökuməti bilet satışı məsələsində qadağaları yumşaldıb.

Nə dəyişib?
• “Çelsi” azarkeşləri səfər oyunlarına bilet ala, həmçinin qonaq fanatlar “Stemford Bric”ə baş çəkə bilər. Düzü, klub hələ də çempionatdakı ev oyunlarına bilet sata bilməyəcək – oyunlarda yalnız mövsümlük abonement sahiblərinin iştirakı mümkündü.

• Əvəzində “Çelsi” ÇL-dəki, İngiltərə kubokundakı (irəlidə “Kristal Pelas”la yarımfinal oyunu var) və qadın Superliqasındakı ev oyunlarına bilet sata biləcək.

• Yenilənmiş hökumət lisenziyası “Çelsi”nin bilet satışında agent kimi iştirakına icazə verəcək. Ancaq satışdan toplanan pul kluba çatmayacaq – ya “icazə verilən 3-cü tərəfə”, ya da başqa kluba veriləcək.

• Premyer-liqanın rəhbərliyi artıq yeniliyi izah edib: adətən, “Çelsi”nin kassasına daxil olan bilet satışı parası İPL-ə çatacaq. İPL “Çelsi”nin həmin gəlirlərin Ukraynadakı faciənin qurbanları üçün xeyriyyəçiliyə sərf olunması ilə bağlı xahişini müsbət qarşılayıb. Xeyriyyəçiliklə məşğul olacaq qurumların adı klubla məsləhətləşmədən sonra yaxın günlərdə açıqlanacaq.

• Abramoviçə məxsus “Fordstam Limited” şirkətinə də klubun üzləşdiyi nəqd pul və likvidlik problemini yüngülləşdirmək üçün 30 milyon funt yatırım etməyə icazə verilib.

Klub nə vaxt satılacaq?

“Çelsi” fəal şəkildə özünə yeni sahib axtarır – sanksiyalar üzündən ev oyunlarının təşkili (hər oyun üçün 900 min funt xərcləyə bilər) və səfər oyunlarına yollanmaq (bütün komanda üçün 20 min funt) hədsiz çətindi. “Trivago” istisna olmaqla bütün sponsorlar klubdan üz döndərib. Bununla belə, ən bədbin proqnozlarda da “Çelsi”nin mövsümün sonuna qədər pulunun olduğu bildirilir.

Bəs klubun satışı ilə bağlı vəziyyət necədi? Sövdələşmə işlərini aparan “Raine” bankı yaxın günlərdə ən yaxşı 3-4 təklifdən ibarət qısa siyahı açıqlayacaq. Ardından potensila müştərilər son təklifini elan etməlidi. Bu mübarizənin qalibi aprelin 2-ci həftəsində bilinəcək. Bundan sonra adı çəkilən bank Britaniya hökumətindən sövdələşmənin rəsmiləşməsi üçün lisenziya istəyəcək. Hər şey plan üzrə getsə, artıq mayda “Çelsi” yeni sahibinə qovuşacaq.
Yeri gəlmişkən...

Putinin köməkçisi Dmitri Peskov Abramoviçin Rusiya ilə Ukrayna arasındakı danışıqların təşkilində iştirakını təsdiqləyib: “O həqiqətən başlanğıc mərhələsində iştirak etdi. İndi isə danışıqlar Rusiya və Ukrayna heyətləri arasında gedir”.

“Çelsi”nin sahibinin Ukrayna iqtidarının xahişi ilə danışıqlarda iştirak üçün fevralda Belarusa baş çəkdiyi, müharibənin ilk günlərində şəxsi təyyarəsi ilə Bakıya gəldiyi haqda da xəbərlər var.