Ukraynaya hərbi təcavüzün Rusiya futboluna – yığmalarına və klublarına necə baha başa gəldiyindən xəbərdarsız.

İş ondadı ki, hərbi müdaxilənin əcnəbi qurbanları da var. Söhbət dərin maliyyə burulğanına düşən “Çelsi”dən, klubun hətta müflislik təhlükəsi ilə üzləşməsindən gedir.
Çempionlar Liqasının son qalibi Roman Abramoviç dönəmində həqiqətən də ən çətin günlərini yaşamaqdadı. Yəhudi əsilli rusiyalı oliqarxın aktivləri dondurulub, klub sahibinə hansısa sövdələşmələrə girmək yasaqdı. Bu da faciənin son həddi deyil: “Çelsi” futbol klubunun gəlirlərinə aid olan hər bir şey Böyük Britaniya hökumətinin xüsusi məhdudiyyəti üzündən qadağa altına düşüb.

Baxın:

• Klub sahibinin mümkün yatırımı yasaqdı;
• Oyun günü gəlirləri məhdudiyyət altındadı (oyunlara bilet satışı dayandırılıb);
• Oyunçuların satışına və başa çatmaqda olan müqavilələrin müddətinin uzadılmasına (indi Xuan Laporta hardasa Aspilikueta və Kristensenin həsrəti ilə əllərini bir-birinə sürtür...) yasaq qoyulub.
Telemüqavilədən gələcək pulun strukturunda dəyişikliklə bağlı hələ heç nə bəlli deyil, əvəzində sponsorluq aspektini təhlil etmək olar.

Bugünlərdə klubun iki titul sponsoru – “Three” mobil operatoru və “Hyundai” avtomobil konserni birtərəfli qaydada əməkdaşlığı dayandırıb. Bu gün üçün klubun tərəfdaşlarının siyahısı:

• Trivago (Almaniya, axtarış sistemi);
• Cadbury (Britaniya, qənnadı məhsulları);
• EA Sports (Avstriya, oyunlar);
• Go Markets (Avstraliya, treydinq);
• Hublot (İsveçrə, saat);
• MSC Cruises (İtaliya/İsveçrə, kruiz);
• Singha (Tayland, pivəbişirmə);
• Sure (“Rexona” şirkətinin Britaniya, İrlandiya və Hindistandakı brendi, qulluq və kosmetika);
• Vitality (Britaniya, sığorta);
• Yokohama Tyres (Yaponiya, təkər istehsalı).

Maraqlı olan məqam budu ki, klub saytının ingilis dili versiyasında əməkdaşlığı dayandıran “Three” və “Hyundai” ilə yanaşı, hələ ki dayandırmayan “MSC Cruises” və “Sure” da yoxdu. Vəziyyət gündən-günə pisləşir. Klubun bank hesabının bloklanması komandanın mövcudluğuna təhlükə yaradıb.

Üstəlik məsələnin aydınlaşma perspektivi ilə bağlı da bilgi yoxdu. Bu məhdudiyyətlər Abramoviçə klubla adi qaydada vidalaşmaq imkanı vermir. Baxmayaraq ki, o özü son günlərdə dəfələrlə “Çelsi”dən getməyə hazır olduğunu bildirib.
Hadisələrin belə axarı fonunda azarkeşlərin “Çelsi”nin mövsümü ən yaxşı şəkildə bitirəcəyinə dair ümidləri də əriməkdədi. Tomas Tixelin komandasının premyer-liqada çempionluğu bayram etməsi müşkül məsələdi. Amma “zadəganlar” həm ÇL-də, həm də İngiltərə kubokunda 1/4 finala vəsiqə qazanıb, deməli, mövsümü iki titulla bitirmələri mümkündü. Yeri gəlmişkən, Liqa kubokunun finalında da oyunsonrası penalti seriyasında “Liverpul”a uduzdular.