İngiltərə Premyer-Liqası Roman Abramoviçi “Çelsi”nin rəhbərliyindən kənarlaşdırıb.

London klubunun sahibi olan rusiyalı iş adamı yerli hökumətin ona və “Çelsi”yə tətbiq etdiyi sanksiyalara görə belə aqibətlə üzləşib. Amma Premyer-Liqa rəhbərliyinin bu qərarı komandanın rəsmi matçlarda iştirakına və məşqlərinə təsir etməyəcək. Qeyd edək ki, Böyük Britaniya hökuməti martın 10-da Abramoviçə qarşı sanksiyalar tətbiq etsə də, klub futbol fəaliyyətini davam etdirmək üçün xüsusi lisenziya alıb. Lakin kluba matçlara bilet satmaq, transfer etmək və oyunçularla müqaviləni yeniləmək qadağan edilib. Həmçinin “Çelsi”nin bank hesabları bloklanıb.
Bu arada “zadəganlar”a növbəti zərbə dəyib. Sponsorlardan “Hyundai” şirkəti klubla əməkdaşlığını dayandırıb. Koreya avtomobil şirkətinin yaydığı məlumatda “Çelsi” ilə əlaqələrin mövcud vəziyyətdə kəsilməsinə qərar verildiyi bildirilib. Maraq üçün “Hyundai” ilə müqavilənin kluba hər il 10 milyon funt sterlinq qazandırdığını xatırladaq. Şirkətin loqotipi son illər komandanın formasının qol hissəsində görünür. Son xəbərlərdə “Nike”ın da klubla əməkdaşlığını birdəfəlik dayandırmağa yaxın olduğu qeyd edilir. Xatırladaq ki, daha əvvəl“Çelsi” titul sponsorunu itirmişdi. “Three” şirkəti kluba sponsorluğunu Abramoviçin bütün aktivlərinin “dondurulması” səbəbindən dayandırmışdı. Telekommunikasiya və internet-provayder şirkəti həmçinin komandanın formasından loqotipini (3) götürəcəyini də bəyan etmişdi.

Vəziyyətin getdikcə pisləşməsi klub rəhbərliyini hökumətə transfer etmək və oyunçularla müqaviləni yeniləməklə bağlı qadağanın ləğvi üçün müraciət ünvanlamağa vadar edib. Yaxın gələcəkdə komandada müdafiəçi qıtlığı yarana bilər. Belə ki, bu mövqedə oynayan Andreas Kristensen, Antonio Rüdiger və Sesar Aspilikuetanın müqaviləsi mövsümün sonunda qüvvədən düşəcək. Hökumət qərarını dəyişməsə, bu oyunçular yayda komandanı tərk edəcək və onların yerinə yeni futbolçular almaq mümkün olmayacaq.