Paolo Maldini “Milan”ın texniki direktoru vəzifəsini daha bir müddət icra edəcək.

53 yaşlı funksioner İtaliya klubu ilə yeni müqavilə imzalayacaq. Yerli mənbələrin xəbərinə görə, onunla anlaşmanın müddəti 2024-cü ilin yayına qədər uzadılacaq. Maldininin həmin il müqaviləni daha birilliyə yeniləmək imkanı da olacaq. Klubun idman direktoru Rikki Massara ilə bağlanacaq yeni müqavilə də “2+1 il” sxemi ilə rəsmiləşəcək.

Qeyd edək ki, Maldini futbolçu karyerasını yalnız “Milan”da keçirib. O, bu komandada 902 oyuna çıxıb. Sabiq müdafiəçi “Milan”la 7 dəfə İtaliya çempionatının, 5 dəfə Çempionlar Liqasının və 5 dəfə UEFA Superkubokunun qalibi olub.