Roman Abramoviç Böyük Britaniyada gözlənilən aqibətlə üzləşib: yerli hökumət “Çelsi”nin sahibinə və kluba sanksiyalar tətbiq edib.

Rusiyalı biznesmenin klub da daxil olmaqla krallıqdakı bütün aktivləri “dondurulub”. Bu isə o anlama gəlir ki, son günlərdə “Çelsi”yə alıcı axtaran 55 yaşlı iş adamı klubu satmaq üçün müəyyən problemlərlə üzləşəcək. Amma sanksiya klubun fəaliyyətini davam etdirməsinə mane olmayacaq. “Çelsi” bunun üçün müvafiq orqandan xüsusi lisenziya alıb. Bu lisenziya komandaya premyer-liqada oynamaq hüququ verir. Ancaq “zadəganlar” bu hüquqdan müəyyən maliyyə məhdudiyyətlərinə riayət etməklə yararlana biləcəklər. Konkret “Çelsi” ev oyunlarının təşkilinə daxil olan təhlükəsizlik, stüard və qidalanma təminatı üçün maksimum 500 min funt sterlinq xərcləyəcək. Paytaxt klubu səfər matçlarına yollanmaq və geri qayıtmaq üçün isə yalnız 20 min funt sterlinq sərf edə biləcək.

İstənilən halda “zadəganlar” üçün müəyyən problemlər ortaya çıxacaq. Çünki kluba ev oyunlarına bilet satmaq yasaqlanıb. Başqa sözlə, tribunalara yalnız mövsümlük abunə biletlərinin sahibləri buraxılacaq. Digər qadağa isə yeni oyunçuların transferi və futbolçularla müqavilələrin yenilənməsinə tətbiq olunub. Klubun mağazalarının bağlanacağı da xəbər verilib.

Artıq “Çelsi” titul sponsorunu itirib. “Three” şirkəti kluba sponsorluğunu dayandırıb. Buna da Abramoviçin bütün aktivlərinin “dondurulması” səbəb olub.

Telekommunikasiya və internet-provayder şirkəti həmçinin komandanın formasından loqotipini (3) götürəcəyini də bəyan edib. “Three”nin yaydığı məlumatda belə deyilir:

“Çelsi”dən kluba tətbiq edilən sanksiyalara görə bizim brendin adı ilə loqosunun formadan silinməsi və stadionun ərazisindən yığışdırılması da daxil olmaqla əməkdaşlığı müvəqqəti dayandırmağı xahiş etmişik. Bu qərarın “Çelsi”nin azarkeşlərinə pis təsir edəcəyini yaxşı anlayırıq. Amma mövcud vəziyyəti və sanksiyaları nəzərə alaraq hesab edirik ki, bu, doğru addımdı”.

“Three” həmçinin bir mobil şəbəkə şirkəti kimi Ukraynadan qaçqın düşən şəxslər arasında əlaqələrin qurulmasına dəstək olacağını da bəyan edib. Son xəbərlərdə digər şirkətlərin də tezliklə klubla əlaqələri kəsəcəyi və ya müvəqqəti dayandıra biləcəyi vurğulanır. Konkret olaraq “Hyundai” və “Nike”ın belə addım atması gözlənilir. Koreya avtomobil şirkətinin yaydığı məlumatda “Çelsi” ilə əlaqələrin yenidən dəyərləndirildiyi bildirilir. Maraq üçün “Hyundai” ilə müqavilənin kluba hər il 10 milyon funt sterlinq qazandırdığını xatırladaq. Şirkətin loqotipi son illər komandanın formasının qol hissəsində görünür. “The Daily Mail” qəzetinin xəbərində “Nike”ın klubla əməkdaşlığını birdəfəlik kəsməyə yaxın olduğu qeyd edilir. İdman mallarının istehsalı üzrə ixtisaslaşan ABŞ şirkəti “Çelsi” ilə 2016-cı ildə ümumi dəyəri 900 milyon funt sterlinq olan 15 illik müqavilə bağlayıb. Dünya brendi londonlularla sazişi pozarsa, klub təxminən 540 milyon funt sterlinq itirə bilər.

“Çelsi”nin satışına gəlincə, bu, müəyyən şərtlər çərçivəsində mümkün ola bilər. Yerli hökumətə istinad edən PA agentliyinin məlumatına görə Abramoviç 2003-cü ildən sahibi olduğu klubu qazanc əldə etməmək şərti ilə sata bilər. Rusiyalı biznesmenin adı “qara siyahı”ya düşəndən sonra dayandırılan satış prosesinin bərpası mümkündü. PA-in xəbərində satışın reallaşmasına hökumətin xüsusi lisenziyasının şərait yarada biləcəyi qeyd edilir. Bu lisenziya isə Abramoviçin satışdan qazanc əldə etməməsi şərti ilə verilə bilər. Yəni klubun yeni sahib(lər)inin ödəyəcəyi məbləğ rusiyalının cibinə girməməlidi. O isə bu ayın əvvəlində satışa çıxardığı “Çelsi”dən azı 3 milyard funt sterlinq qazanmaq niyyətində idi. Hökumət isə dünən potensial alıcıların təkliflərini qəbul etməyə hazır olduğunu bəyan edib. Bunu Böyük Britaniyanın rəqəmsal texnologiyalar, mədəniyyət, KİV və idman naziri Kris Filip dilə gətirib.
“Sky Sports” telekanalının dünənki məlumatında isə Abramoviçin qazanc əldə etməmək şərti ilə alıcılarla anlaşması üçün 81 günlük vaxtının olduğu bildirilirdi. Məsələ ondadı ki, kluba mövsümün sonunadək fəaliyyət göstərməsi üçün verilən lisenziyanın müddəti mayın 31-də sona çatacaq. Əks halda “Çelsi”nin İngiltərə futbolunun strukturunda fəaliyyətdə olan müəssisə kimi mövcudluğu sual altına düşəcək...