Rusiyanın Ukraynaya hərbi müdaxiləsinin davam etməsi “Çelsi”ni, belə desək, iflic vəziyyətinə salıb.

İngiltərə klubu növbəti sanksiyalara məruz qalıb.

Klubun bank hesabları müvəqqəti “dondurulub”. Böyük Britaniyanın “Barclays” başda olmaqla aparıcı bankları klubun hesablarını bloklayıb. Buna səbəb kimi yerli hökumətin “Çelsi”nin sahibi Roman Abramoviçə qarşı sanksiyalar tətbiq etməsi göstərilib. Klubun fəaliyyətini davam etdirməsi üçün verilən lisenziyaya yenidən baxılması mümkündü. Buna baxmayaraq, “Çelsi”nin bir sıra korporativ hesabları, o cümlədən kredit kartları “dondurulub”. Ona görə ki, banklar mövcud vəziyyətdə riskə getmək istəmirlər.

İngiltərə Premyer-Liqası isə Abramoviçi “Çelsi”nin rəhbərliyindən kənarlaşdırıb. Rusiyalı iş adamı yerli hökumətin ona və kluba tətbiq etdiyi sanksiyalara görə belə aqibətlə üzləşib. Amma Premyer-Liqa rəhbərliyinin bu qərarı komandanın rəsmi matçlarda iştirakına və məşqlərinə təsir etməyəcək. Qeyd edək ki, Böyük Britaniya hökuməti martın 10-da Abramoviçə qarşı sanksiyalar tətbiq etsə də, klub futbol fəaliyyətini davam etdirmək üçün xüsusi lisenziya alıb. Lakin kluba matçlara bilet satmaq, transfer etmək və oyunçularla müqaviləni yeniləmək qadağan edilib. Həmçinin “Çelsi”nin bank hesabları bloklanıb.

Bu arada “zadəganlar”a növbəti zərbə dəyib. Sponsorlardan “Hyundai” klubla əməkdaşlığını dayandırıb. Koreya avtomobil şirkətinin yaydığı məlumatda “Çelsi” ilə əlaqələrin mövcud vəziyyətdə kəsilməsinə qərar verildiyi bildirilib. Maraq üçün “Hyundai” ilə müqavilənin kluba hər il 10 milyon funt sterlinq qazandırdığını xatırladaq. Şirkətin loqotipi son illər komandanın formasının qol hissəsində görünürdü. Son xəbərlərdə “Nike”ın da klubla əməkdaşlığını birdəfəlik dayandırmağa yaxın olduğu qeyd edilir. Xatırladaq ki, daha əvvəl “Çelsi” titul sponsorunu itirmişdi. “Three” şirkəti kluba sponsorluğunu Abramoviçin bütün aktivlərinin “dondurulması” səbəbindən dayandırmışdı. Telekommunikasiya və internet-provayder şirkəti həmçinin komandanın formasından loqotipini (3) götürəcəyini də bəyan etmişdi.

Vəziyyətin getdikcə pisləşməsi klub rəhbərliyini hökumətə transfer etmək və oyunçularla müqaviləni yeniləməklə bağlı qadağanın ləğvi üçün müraciət ünvanlamağa vadar edib. Yaxın gələcəkdə komandada müdafiəçi qıtlığı da yarana bilər. Belə ki, bu mövqedə oynayan Andreas Kristensen, Antonio Rüdiger və Sesar Aspilikuetanın müqaviləsi mövsümün sonunda qüvvədən düşəcək. Hökumət qərarını dəyişməsə, bu oyunçular yayda komandanı tərk edəcək və onların yerinə yeni futbolçular almaq mümkün olmayacaq.

Futbolçulardan söz düşmüşkən, onlardan bəziləri kluba qoyulan qadağalar səbəbindən “Çelsi”ni tərk etmək istəyirlər. “The Telegraph”ın məlumatına görə, bir sıra oyunçular həm də Abramoviçə tətbiq edilən sanksiyalar üzündən klubun bank hesablarının bloklanmasına, transfer qadağası almasına və bilet satışını reallaşdıra bilməməsinə görə narahatdılar. Onlar komandanın maliyyə vəziyyətinin pisləşəcəyini düşünürlər. “The Telegraph” onu da qeyd edir ki, adı açıqlanmayan oyunçuların menecerləri müştərilərinin müqavilələrinə xitam verilməsi imkanlarını müzakirə etmək üçün vəkillərlə əlaqə saxlayıblar. Klub maaşları gecikdirməyə başlayarsa, futbolçular tərəfindən müqavilənin pozulması variantı nəzərdən keçiriləcək.

RAMİL YUSİFOVOV hazırladı