ATP-nin rəsmi saytının yaydığı xəbərə görə, almaniyalı tennisçi Aleksandr Zverev qeyri-idmani davranışa görə 8 həftəlik diskvalifikasiya olunub və 25 min dollar cərimələnib.

Hər iki sanksiya sınaq müddəti qoyulmaqla şərti xarakter daşıyır.

24 yaşlı tennisçi fevralın sonunda keçirilən Akapulko turnirinin ilk dövrəsində uduzandan sonra baş hakimin qülləsinə yaxınlaşaraq, raketka ilə bir neçə zərbə endirib. ATP-nin 25 min dollar cərimə və 8 həftə diskvalifikasiya qərarı tennisçi gələn il fevralın 23-nə qədər müəyyənləşdirilən sınaq müddətində bir daha qayda pozuntusuna yol verərsə, qüvvəyə minəcək. Zverev martın 11-nə qədər bu qərardan apellyasiya şikayəti verə bilər.

Zverev buna qədər artıq Akapulkodakı davranışına görə 40 min dollar cərimələnmişdi. Tennisçi həmçinin 31570 dollar mükafatdan və turnirdə qazandığı reytinq xallarından məhrum olunub.