"Qəbələ" "Şəfa"nı, "Zirə" "İmişli"ni qəbul edir

Çempionlar və Konfrans Liqasında iştirak edən komandalarımızın - "Sabah" və "Qarabağ"ın pley-off mərhələsindəki ilk oyunları geridə qaldı. İndi premyer-liqaya boylanmağın vaxtıdı. Ona görə ki, elita klublarının yarışında 2-ci turun matçlarına şahidlik edəcəyik.

Əvvəlcədən xatırladaq ki, ölkəmizin beynəlxalq arenada idman nüfuzunun uğurla təmsil olunması məqsədilə "bayquşlar"ın "Sumqayıt"a, "köhlən atlar"ın "Kəpəz"ə qarşı matçları təxirə salınıb. Odu ki, cəmi 4 matç keçiriləcək və hər biri "CBC Sport"un efirində canlı yayınlanacaq.

Misli premyer-liqası
1-ci dövrə, 2-ci tur
22 avqust
Qəbələ - Şəfa
"Qəbələ" indiyə qədər bu rəqiblə evdə qarşılaşmayıb.
Cəzalı: Asif Məmmədov (Qəbələ).
"Futbol+"in proqnozu: 40-30-30.
Qəbələ, şəhər stadionu. Saat 18.30.

İlk turda "Turan Tovuz"un qonağı olan "Qəbələ" üçün mövsüm uğurlu başlamadı. Güclü rəqibinin meydanında minimalhesablı məğlubiyyətlə üzləşən "qırmızı-qaralar" evə məyus qayıtdı. İndi isə ilk qələbəni qazanmaq vaxtıdı. Çünki "doğma divarlar arasında" "Şəfa" ilə qarşılaşacaq bölgə təmsilçisinin şansları yüksək qiymətləndirilir. Ancaq debütanta yuxarıdan aşağı baxmaq olmaz. Çünki Zaur Həşimovun komandası "Zirə"yə uduzsa da, pis oynamadı. Həm meydan sahiblərinin, həm də qonaqların premyer-liqada qalmaq uğrunda mübarizə aparacağını nəzərə alsaq, hər iki tərəf qalib gəlmək uğrunda döyüşəcək. Belədə baxımlı oyun izləyəcəyimizə şübhə yoxdu. Axı heç kim əvvəldən autsayder mövqeyində qərarlaşmaq, mövsümü ciddi təzyiq altında keçirmək niyyətində deyil.

Zirə – İmişli
"Zirə"nin bu rəqiblə ev oyununun balansı: 1:+0=1-0, 0:0.
2025/26 - 0:0.
Cəzalı: yoxdu.
"Futbol+"in proqnozu: 40-30-30.
Zirə, İdman Kompleksinin stadionu. Saat 20.45.

"Zirə"nin işləri yolunda gedir. Konfrans Liqasında uğursuzluqla üzləşən "qartallar" üçün münasib təqvim var və bundan maksimum faydalanmaq vacibdi. Bilindiyi kimi, komanda ölkə çempionatının yeni mövsümündə ilk üç xalını qazandı. Bu uğura "Şəfa"nı məğlub etməklə imza atan qəsəbə təmsilçisi indi "İmişli"yə tərs üzünü göstərməyə çalışacaq. Amma bu dəfə hədəfə çatmaq daha çətin olacaq. Çünki ötən həftə "Araz-Naxçıvan"dan xal qoparan "pələnglər" yenə azı "sülh" uğrunda mübarizə aparacaq.

Bu komandalar indiyə qədər 3 dəfə qarşılaşıb. Bütün görüşlər heç-heçə bitib. Topların nisbəti belədi - 1:1.

23 avqust
Turan Tovuz – Şamaxı
"Turan Tovuz"un bu rəqiblə ev oyunlarının balansı: 5:+2=2-1, 8:8.
2022/23 - 1:3, 1:1; 2024/25 - 3:2, 1:1; 2025/26 - 2:1.
Cəzalı: yoxdu.
"Futbol+"in proqnozu: 40-40-20.
Tovuz, şəhər stadionu. Saat 18.30.

Mövsümə çempion olmaq iddiası ilə start verən "Turan Tovuz" işə "Qəbələ"ni yenməklə başladı. İddialılar sırasında qərarlaşmaq üçün uğurlu nəticələri davam etdirmək lazımdı ki, bu baxımdan "Şamaxı" münasib rəqibdi. İkinci matçını da minlərlə azarkeşlərin dəstəyi fonunda keçirəcək "bozqurd" bu fürsətdən də maksimum istifadə etməli, xal ehtiyatını artırmalıdı. Mövsümlərarası fasilədə, demək olar ki, bütünlüklə yenilənən "şirlər" isə "Qarabağ"a məğlubiyyəti unutmalı və çətin səfərdən azı "sülh"lə qayıtmağın yollarını tapmalıdı. Azı ona görə ki, Azər Bağırovun bu yöndə təcrübəsi var və məqsəd premyer-liqadakı yeri qorumaq olsa da, təhlükəli zonadan uzaq gəzmək vacibdi.

Bu komandalar indiyə qədər 11 dəfə üz-üzə gəlib. Bunların 5-də Tovuz, 2-də Şamaxı təmsilçisi qələbə qazanıb, 3-də qalib müəyyənləşməyib. Topların nisbətində "bozqurd" öndədi - 15:13.

Neftçi – Araz-Naxçıvan
"Neftçi"nin bu rəqiblə ev oyunlarının balansı: 8:+4=3-1, 18:6.
2000/01 - 6:0; 2001/02 - 3:0; 2023/24 - 1:1, 3:0; 2024/25 - 0:1, 1:1; 2025/26 - 2:2, 2:1.
Cəzalı: yoxdu.
"Futbol+"in proqnozu: 50-30-20.
Bakı, "Palms Sports Arena". Saat 20.45.

Bəli, tura "Neftçi"nin ev oyunu ilə yekun vurulacaq. Ötən həftə "Sumqayıt"ın meydanından qələbə ilə ayrılan "ağ-qaralar" evdə də bu uğuru təkrarlamağa çalışacaq. Qələbə həm də iddialılar sırasında qalmaq baxımından önəmlidi. Axı paytaxt təmsilçisinin hədəfi çempion olmaqdı və daha güclü rəqiblərlə qarşılaşmalara qədər mümkün qədər xal ehtiyatı toplanmalıdı. "Araz-Naxçıvan"a gəlincə, Cavid Hüseynovun komandasında ciddi problemlər var. Söhbət "qırmızı-ağlar"ın hazırlıq prosesini lazımi səviyyədə keçməməsindən və bunun matçlara təsirsiz ötüşməməsindən gedir. Görək, gənc mütəxəssis uğura gedən yolda maneələrin öhdəsindən gələ biləcək, yoxsa naxçıvanlılar mövsümlərarası fasilədə yol verilən səhvlərin qurbanı olmağa davam edəcək?

Bu komandalar indiyə qədər 15 dəfə qarşılaşıb. Həmin oyunların 6-da "Neftçi", 4-də "Araz-Naxçıvan" qalib gəlib, 5-də heç-heçə qeydə alınıb. Topların nisbətində bakılılar öndədi - 31:11.

Bu komandaların duelləri haqda maraqlı məqamlar
// "Zirə" ilə "İmişli"nin son iki matçında, o cümlədən "qartallar"ın ev oyununda qol vurulmayıb.
// “Turan Tovuz” son 4 ev oyununda uduzmayıb. “Şamaxı” bütün səfər matçlarında həm qol vurub, həm də qol buraxıb.
// “Araz-Naxçıvan” 4 matçdı qalib gəlmir. “Neftçi” son iki qarşılaşmada xal itirməyib.

KƏNAN BAHADIR