Aleksander Nübel və Doğan Aləmdar kimi qapıçıları transfer edən “Beşiktaş”ın Ərsin Destanoğlu ilə yolları ayırdığını xəbər vermişdik. Bu istedadlı qapıçının yeni klubunun adına rəsmən aydınlıq gəlib.

"Football-plus.az" xəbər verir ki, daha öncə “Hall Siti” ilə danışıqlar aparan Ərsinin karyerasını İngiltərədə davam etdirəcəyi ilə bağlı yayılan xəbərlər təsdiqini tapmayıb. Görünür, o, Acun Ilıcalının komandası ilə anlaşa bilməyib. Nəticədə Destanoğlu BƏƏ-yə yollanmaq qərarına gəlib. O, bu ölkənin nəhəglərindən olan “Əl-Cəzirə” ilə üçillik müqavilə imzalayıb. Transferin digər detalları barədə hələ ki məlumat yoxdu. “Beşiktaş” öz yetirməsi olan 24 yaşlı qapıçıdan maddi planda heç bir xeyir götürə bilmədi. Çünki Destanoğlunun müqavilə müddəti başa çatmışdı və o, yeni klubu ilə sərbəst futbolçu statusunda anlaşdı.

Bu arada İstanbul nəhənginin yeni əsas qapıçısı Aleksander Nübellə bağlı maraqlı bir iddia ortaya atılıb. Ümumiyyətlə, XXI əsrdə “qartal” əcnəbi qapıçılardan çox da fayda görməyib. Yalnız kolumbiyalı Oskar Kordoba (2002-06) ilə ispaniyalı Fabrini (2016-18) bu baxımdan istisna saymaq olar. Ona görə də yeni mövsüm üçün qarşısına ciddi hədəflər qoyan “ağ-qaralar”ın belə məqamda əcnəbi qapıçıya güvənməsi maraq doğurur.

Türkiyəli jurnalist Fırat Günayerin xəbərinə görə, almaniyalı Nübel “Beşiktaş”a transferdən öncə klubla bağlı geniş məlumat toplamaq üçün həmyerlisi Loris Kariusla söhbətləşib. Karius, bilindiyi kimi, 2018-20-ci illərdə icarə əsasında “Beşiktaş”da forma geyib. Mənbənin yazdığına inansaq, Karius Nübelə Türkiyəyə yollanmamağı məsləhət görüb. O, “Beşiktaş”da və Türkiyənin digər klublarında maaşların, eləcə də digər ödəmələrin gecikdirildiyini bildirib. Yaşanan bu olayın ardından məsələyə “qartal”ın almaniyalı baş skautu Eduard Qrafe daxil olub. O, Nübellə söhbət edərək maddi sıxıntıların əvvəlki rəhbərliyin dönəmində olduğunu, hazırda isə klubda bu baxımdan heç bir problem olmadığını vurğulayıb. Bu sözlər Nübeli razı salmaq üçün kifayət edib.

Onu da bildirək ki, bu yay ulduz futbolçu transfer edə bilmək üçün dəridən-qabıqdan çıxan “Beşiktaş” rəhbərliyi belçikalı Leandro Trossarla danışıqlarda xeyli irəliləyə bilib. Təcrübəli futbolçunun özü ilə “3+1” illik anlaşma əldə olunub. Yalnız bonus məsələsində fikir ayrılığı yaşanır. Hazırda “Arsenal”la danışıqlar davam edir. Türkiyə mənbələri artıq mundialda çıxışını başa vuraraq tətilə yollanan Trossarın bu həftənin sonuna qədər Türkiyəyə gələ biləcəyini istisna etmir.