“Araz-Naxçıvan” Misli premyer-liqasının Mehdi Hüseynzadə adına Sumqayıt şəhər stadionunda keçirilən 12-ci tur matçında “Turan Tovuz”la heç-heçə etdi – 1:1.

Muxtar Respublika təmsilçisinin futbolçusu Bəxtiyar Həsənalızadə oyundan sonra “Football-plus.az”ın suallarını cavabladı.

– Matçı necə dəyərləndirirsən? Səncə, niyə xal itirdiz?
– Bəli, bu gün 2 xal itirdik. Turnir cədvəlində “Turan Tovuz”dan geridəyik. Qələbə qazanmaq lazım idi. Əlimizdən gələni etdik. Lakin məqsədimizə çata bilmədik. Birinci hissədə üstünlük bizim tərəfdə idi. Qalib gəlmək üçün birinci yarıdakı oyunu fasilədən sonra da göstərməliydik. Ancaq konsentrasiya əskikliyi yaşadıq.

– Avrokuboklara vəsiqə uğrunda mübarizə aparsaz da, hələ ilk “dördlük”dən kənardasız. “Araz-Naxçıvan” niyə sabit nəticələr qazana bilmir?
– Çempionatımız ildən-ilə inkişaf edir. Rəqabət artıb. Rəqiblərin heyətləri güclənib. Legioner limiti də yığışdırılıb... Bilmirəm, bu qərar xeyrimizədi, ya yox... Ancaq bəzi komandalar meydana 11 legionerlə çıxır. Xatırlayıram ki, ötən mövsüm uzun müddət ikinci pillədə qaldıq. Bizdən xeyli arxada olan “Zirə” sonradan bizi qabaqladı. Bu səbəbdən çempionatın necə bitəcəyini təxmin etmək çətindi. Hədəfimiz avrokuboklara yollanmaqdı. İstəyirik ki, mövsümü azı 4-cü sırada başa vuraq.

– Hazırda “Araz-Naxçıvan” çempionatın ən az tamaşaçı toplayan komandasıdı. Səncə, azarkeş dəstəyinin bu səviyyədə olmasının səbəbi təkcə doğma diyarda oynamamağınızdı?
– Bəli, Naxçıvanda məskunlaşsaq, bəlkə də çempionatın ən çox azarkeşi olan komandası biz olarıq. Bəli, biz uzaq məsafədə olan naxçıvanlıları anlayışla qarşılayırıq. Lakin Bakıda qalan tərəfdarlar stadiona gəlib bizə dəstək olsa, çox sevinərik. Hər birini tribunalarda görmək istəyirik.

– Bayaq legioner limitiylə bağlı qeyri-dəqiq danışdın...
– Bu barədə çox danışmaq istəmirəm (düşünür)... Ancaq legioner limitinin aradan qaldırılması azərbaycanlı futbolçuların ziyanınadı. Hər şey göz qabağındadı. Oyun təcrübəsi olmayan futbolçular milliyə çağrılır...

KƏNAN BAHADIR