''Qalatasaray''ın növbəti çempionluğu qazanması və ''Fənərbaxça''nın mövsümü ikinci pillədə bitirməsi ilə birlikdə ortaya yenə çox diqqətçəkən bir statistik məqam çıxdı.

"Football-plus.az" xəbər verir ki, son 30 ilə nəzər salsaq, ikincilik sanki ''Fənər''in alnına yazılıb! Komanda heç cür belə desək, ikinci damğasından qurtula bilmir. ''Sarı-lacivərdlilər'' son 30 ildə, yəni 1996-cı ildən bu yana düz 15 dəfə gümüş medallarla kifayətlənməli olublar. Bu 15 haldan 12-də çempion məhz ''Qalatasaray'' olub! Digər ikinciliklərdən 2009/10-da çempion ''Bursaspor'', 2015/16-da çempion ''Beşiktaş'', 2021/22-də isə çempion ''Trabzonspor'' olub.

Son 30 ildə Türkiyə futbolunda qüvvələr nisbətinin qorxunc səviyyədə ''Qalatasaray''ın lehinə dəyişməsi diqqət çəkir. Təsəvvür edin, 1995/96-da ''Fənər'' Karlos Alberto Parreyra ilə zəfərə nail olduqda tarixinin 13-cü çempionluğunu qazanmışdı. Həmin vaxt vaxt, yəni 1996-nın yayında ''Qalatasaray''ın yalnız 10 çempionluğu var idi. Amma o tarixdə Fatih Terimin ''Cim-Bom''un başına keçməsi ilə birlikdə Türkiyə futbolunda qüvvələr nisbəti dəyişməyə başladı.

Hazırda ''Qalatasaray'' əzəli rəqibindən 7 çempionluq öndədi. Yəni son 30 ildə ''Fənərbaxça'' 6, ''Qalatasaray'' isə 16 dəfə çempion olub!