''Beşiktaş''ın kapitanı və ulduzu Orkun Kökçü ilə bağlı yeni transfer iddiası ortaya atılıb.

"Football-plus.az" xəbər verir ki, ''Fanatik'' nəşrinin İngiltərə mənbələrinə əsasən yazdığı xəbərə inansaq, ''Mançester Yunayted''in bu yay üçün əsas transfer hədəfi məhz Orkundu. Yeni mövsümün planlarını cızan İngiltərə nəhəngi Kazemiro və

Manuel Uqarte ilə yollarını ayırmağı planlaşdırır. ''Qırmızı şeytanlar'' bu futbolçuların ayrılmasından sonra yarımmüdafiənin mərkəzində yaranacaq boşluğu Orkun Kökçü ilə doldurmaq niyyətindədi. Manikunianların İstanbul nəhənginə 60 milyon avro təklif edəcəyi bildirilir! Transfer bu qiymətə baş tutsa, Orkun Türkiyə çempionatı tarixində ən baha qiymətə satılan futbolçuya çevriləcək.

25 yaşlı yarımmüdafiəçi ''Beşiktaş''a ötən yay ''Benfika''dan gəlib. Türkiyə yığmasının üzvü 30 milyon avroya başa gəlib və ''ağ-qaralar''ın tarixinin ən bahalı futbolçusu statusundadı. O, bu mövsüm 36 rəsmi oyunda aktivinə 9 qol, 9 məhsuldar ötürmə yazıb. Orkun şəxsi rekordunu yeniləyərək karyerasının ən yaxşı mövsümünü keçirməsi üçün qalan matçlarda ən azı 5 qolda yaxından iştirak etməlidi.

Qışda ''Zenit'' bu futbolçu üçün 30 milyon avro təklif etsə də, ''Beşiktaş'' onu satmaq istəməmişdi.