Arbeloa Arda Güləri təriflədi
''Real'' ardıcıl 2-ci mövsümü ciddi titul qazanmadan başa vurmaq üzrədi. Komanda yenə nə La Liqada ümidləri doğrulda bildi, nə də Çempionlar Liqasında. Amma Arda Gülərin ''Bavariya'' ilə səfər matçında vurduğu qollar hələ uzun müddət xatırlanacaq.
Madrid nəhəngi bu gün 32-ci tur çərçivəsində ''Alaves'' ilə qarşılaşacaq. Baş məşqçi Alvaro Arbeloa oyunöncəsi mətbuat konfransında acıqlamalar verib. O, Arda Gülərə də toxunaraq türkiyəli ulduza tərif yağdırıb:
''Son 3 ay çox intensiv və gərgin keçdi. Arda ilə aramızda çox gözəl, səmimi münasibət yarandı. Bu vəzifəyə yeni gəldiyim günlərdə Ardanın vacib oyunlarda şans qazanmayacağına dair söz-söhbətlər eşidirdim. Ancaq onun ''Mançester Siti'' və ''Bavariya''ya qarşı oyunlarda nələr etdiyini hər kəs gördü. Hər zaman onun istedadına güvənmişəm. Onun nə qədər istəkli olduğunu və hər dəfə fədakarlıqlar etməyə hazır olduğunu görürəm. Bu, onun öz uğurudu. Çünki yolboyu etdiyi bəzi səhvlərdən çox gözəl nəticə çıxarmağı bacardı. Arda əla mövsüm keçirir. Onun haqda danışarkən ''gələcəkdə böyük işlər görəcək'' demək düzgün deyil. Çünki böyük işləri artıq indidən görür''.
Türkiyə yığmasının üzvü bu mövsüm ''Real''ın heyətində 49 rəsmi oyunda aktivinə 6 qol, 13 məhsuldar ötürmə yazıb.
Digər xəbərlər
