MHL-də müntəzəm çempionat bu gün başa çatacaq və Stenli kuboku uğrunda mübarizə start götürəcək.

"Football-plus.az" xəbər verir ki, “Vaşinqton” və bu komandanın rusiyalı ulduzu Aleksandr Oveçkin üçün isə mövsüç bitib. 82 oyuna 95 xal toplayan paytaxt təmsilçisi Şərq konfransında 9-cu yeri tutmaqla pley-offa vəsiqə qazana bilmədi. Təbii ki, indi Oveçkinin taleyinin necə olacağı böyük maraq doğurur. Ünlü forvardın klubla müqaviləsinin müddəti bu mövsümün sonunda başa çatacaq. Oveçkin srağagün keçirilən “Kolambus”la oyundan sonra gələcəyi haqda danışıb: “Ümid edirəm ki, bu, sonuncu oyunum deyil. Nəyin baş verəcəyini bilmirəm. Baxarıq. Kolumbiya dairəsindən və başqa yerlərdən bura fanatların gəlişi möhtəşəmdi. Onların “daha bir il” şüarını eşitdim. Bu mənim üçün vacibdi, azarkeşlərin hörmətini göstərir. Odu ki, dəstəyə görə sağ olun”.

Rusiyalı forvard onu da əlavə edib ki, gələcəyini “Kepitalz”ın baş məşqçisi Spenser Karberu, baş menecer Kris Patrik, prezident Brayan Maklellan və klubu sahibi Ted Leonsis, həmiçinin ailəsi ilə müzakirə etməyi planlaşdırır: “Ailəmlə birgə bir müddət Kolumbiya dairəsində olacağıq. Evə nə vaxt uçacağımızı bilmirəm. Yəqin ki, mayda”.

“Mash na sporte” portalı isə Oveçkinin ətrafına istinadlar onun daha bir mövsümü “Vaşinqton”da keçirəcəyini xəbər verib. Həmin qaynaq iddia edir ki, 40 yaşlı rusiyalı ulduz yaxın vaxtlarda birillik yeni müqavilə imzalayacaq. Amma Oveçkin “Dinamo”ya dönmək arzusunu da gizlətmir. Sadəcə, bu hadisə bir il sonra baş verə bilər.

Oveçkinin müntəzəm çempionatın son mövsümündəki göstəricilərinə də nəzər salaq. 82 oyunun hamısında iştirak edən rusiyalı hokkeyçi 32 qol və 32 məhsuldar ötürmə ilə toplam 64 xal topladı. Tom Uilsondan iki qol artıq vuran Ovi komandasının ən yaxşı snayperi oldu. Xal sayına görə isə liderliyi həmin Uilsonla bölüşdü.

82 oyunun hamısına çıxan Oveçkin bu göstəricidə də MHL tarixinə düşdü. O, liqa tarixində 40 yaşı tamamlayandan sonra mövsümün bütün oyunlarında iştirak edən 5-ci hokkeyçidi. Əvvəllər bunu Yaromir Yaqr (2013/14, 2016/17 mövsümləri), Niklas Lindstrem (2010/11), Teemu Selyanne (2011/12) və Deyv Andreyçuk (2003/04) bacarıb.

2005-ci ildən “Vaşinqton”un formasını geyən Oveçkinin klubla müqaviləsinin müddətinin 2025/26 mövsümünün sonunda bitəcəyini bir qədər əvvəl vurğuladıq. Amma 40 yaşlı forvardı daha bir mövsüm oynamağa sövq edən daha bir önəmli səbəb var. İş ondadı ki, Oveçkin müntəzəm çempionatda 929 qol vurmaqla bu göstəricidə Ueyn Qretskini (894) arxada qoysa da, pley-off nəzərə alınmaqla qol sayında əfsanəvi kanadalıdan geri qalır. Belə ki, Qretskinin hesabında ümumilikdə 1016 (894+122) qol varsa, Oveçkinin göstəricisi 1006-ya (929+77) bərabərdi. Heç şübhəsiz, “Vaşinqton”un forvardı ümumi qol sayında da Qretskini arxada qoymaq həvəsi ilə alışıb-yanır. Yəni Oveçkinə vahid rekordçu olmaq üçün daha 11 qol lazımdı.

MHL ilə bağlı daha bir önəmli xəbər budu ki, aprelin 14-də keçirilən oyunlardan sonra bu il Stenli kuboku uğrunda mübarizə aparacaq bütün komandalar müəyyənləşdi. Qərb konfransından “Kolorado”, “Dallas”, “Minnesota”, “Veqas”, “Yuta”, “Edmonton”, “Anahaym” və “Los-Anceles”, Şərq konfransından isə “Karolina”, “Baffalo”, “Tampa-Bey”, “Monreal”, “Pittsburq”, “Boston”, “Ottava” və “Filadelfiya” mübarizəni davam etdirir. Aprelin 14-də pley-offa sonuncu vəsiqələr “Anahaym”, “Los-Anceles” və “Filadelfiya”ya qismət oldu.

14 aprel
Tampa-Bey – Detroyt 4:3 OT (1:1, 2:0, 0:2, 1:0
Filadelfiya – Karolina 3:2 B (0:2, 2:0, 0:0, 0:0)
Florida – Reyncers 3:2 (2:1, 0:1, 1:0)
Toronto – Dallas 5:6 (3:0, 0:3, 2:3)
Neşvill – San-Xose 2:3 (0:0, 0:1, 2:2)
Sent-Luis – Minnesota 6:3 (1:2, 3:1, 2:0)
Çikaqo – Baffalo 1:5 (1:1, 0:1, 0:3)
Edmonton – Kolorado 1:2 B (0:0, 1:1, 0:0, 0:0)
Sietl – Los-Anceles 3:5 (0:2, 0:1, 3:2)
Veqas – Vinnipes 6:2 (0:0, 2:0, 4:2)

15 aprel
Aylenders – Karolina 1:2 (0:1, 1:0, 0:1)
Boston – Nyu-Cersi 4:0 (4:0, 0:0, 0:0)
Kolambus – Vaşinqton 1:2 (0:0, 1:1, 0:1)
Filadelfiya – Monreal 4:2 (2:0, 1:2, 1:0
Minnesota – Anahaym 3:2 (1:1, 1:0, 1:1)
Kalqari – Kolorado 1:3 (0:0, 1:1, 0:2)
Yuta – Vinnipeq 5:3 (1:0, 1:1, 3:2)
Sent-Luis – Pittsburq 7:5 (1:3, 3:1, 3:1)
Vankuver – Los-Anceles 4:3 OT (1:1, 2:2, 0:0, 1:0)

16 aprel
Baffalo – Dallas 3:4 B (1:1, 2:2, 0:0, 0:0)
Tampa-Bey – Reyncers 2:4 (0:1, 1:3, 1:0)
Florida – Detroyt 8:1 (1:0, 4:1, 3:0)
Ottava – Toronto 3:1 (1:0, 1:0, 1:1)
Çikaqo – San-Xose 5:2 (0:1, 1:1, 4:0)
Veqas – Sietl 4:1 (0:0, 1:1, 3:0)