2022-ci ilin iyulunda PFL prezidenti postundan gedən Ramin Musayev artıq uzun müddətdi futbol təsərrüfatında yoxdu. Həmin vaxtdan bəri Novxanıda – bağ evində yaşayır. Təbii ki, futbolda başverənlərlə yaxından maraqlanır.

Onunla söhbətdə bəzi suallara cavab tapmağa çalışıq.

- Necəsiz, hazırda nə işlə məşğulsuz? Sağlıq durumunuz necədi?
- Novxanıda, bağ evində dincəlirəm. Balaca fermamız, qoyun-quzumuz var, onlarla məşğulam. Yaraşıqlı atlarım var, onlarla vaxtımı keçirirəm. Kənddə doğulub-böyümüşəm, kənd həyatına marağım böyükdü. Sağlıq durumumdan narazı deyiləm. Şükürlər olsun.

- Ölkə çempionatını izləyirsizmi? Siz də düşünürsüz ki, “Qarabağ” artıq çempionluğu əldən verib?
- Əlbəttə, izləyirəm, izləməliyəm. 19 ilimi futbola həsr etmişəm. İstəsəm də, istəməsəm də, izləməliyəm. Maraqlı oyunlar gedir, maraqlı çempionat keçirilir.

- “Qarabağ”ın bu mövsüm çempionluq seriyasının qırılmağa yaxın olması Çempionlar Liqasında mübarizəni yaza qədər davam etdirməsi ilə bağlıdı, yoxsa legioner limitinin ləğvi ilə? Belə fikirlər var ki, məhz limitin ləğvindən sonra “Sabah” saysız-hesabsız legioner gətirdi, “köhlən atlar”ı üstələməyi bacardı.
- “Qarabağ”ın çempionluqla vidalaşması... Son oyunlarda, məncə, komanda yorulub. Oyun sayı, səfərlərə gedib-gəlmək. Yayda digər komandalar dincəldi, bunların vaxtı olmadı. Legioner limitinin ləğvi komandalara yox, milli komandaya təsir edəcək, edir. Limitin ləğvi komandaları gücləndirdi. “Sabah” gözəl oyun nümayiş etdirir. Çempionata rəng qatır, gözəllik verir. “Qarabağ” və “Zirə” ilə oyunları çox maraqlı olur. “Qarabağ” da, “Sabah” da özündən zəif komanda ilə xal itirir, bunlar futbolda olan şeylərdi.

- “Qarabağ” rəhbərliyinin müxtəlif turnirlərdə mübarizə aparan komandanın heyətini gücləndirmək üçün real addımlar atmamasıyla bağlı tənqidlə razısızmı?
- Sözsüz, digər komandalar kimi “Qarabağ” rəhbərliyi də istəyər ki, komandaları daha güclü olsun. “Qarabağ” bugünədək sözünü demiş komandadı. İnanmıram ki, rəhbərlik bundan sonra uğur qazanmamaqla barışsın.

- Kubokda hansı komandanı şanslı görürsüz? “Zirə” finala ən yaxın komandadı. Sizcə, sensasiya edib “Qarabağ” - “Sabah” cütünün qalibini məğlub edə bilər?
- “Zirə”nin şansı var, qazana bilər. Niyə də qazanmasın?! Rəqibinin kim olacağını indidən demək çətindi. Amma şansı var ki, kuboku qazansın.

- Ötən il kubokun finalına dəvət olunmadığınıza görə narazılığınızı bildirmişdiz. Bu mövsümün finalına dəvət gözləyirsizmi?
- Kubokun finalına dəvət etmədilər, canları sağ olsun. Ehtiyac da yoxdu heç. Olacaq “toydan sonra nağara”. Çağırsaydılar, indiyədək çağırardılar. Ən çox “Sabah” və “Sumqayıt” klublarından diqqət görmüşəm. Həqiqətən də, çox maraqlı çempionatımız keçir. Sağ olsun PFL-in işçiləri. Elxan müəllimə (PFL-in prezidenti Elxan Səmədovu nəzərdə tutur – red.) də işlərində uğurlar arzulayıram.

- PFL söz düşmüşkən, bu qurumun ləğv oluna biləcəyi ilə bağlı söhbət gəzir. PFL müstəqil şəkildə fəaliyyətinə davam etməli, yoxsa AFFA-nın tərkibində “əriməlidi”?
- Mən də PFL ilə AFFA-nın yola getmədiyini eşitmişəm. Elə jurnalistlərdən bilmişəm mən də. PFL müstəqil qurum kimi davam etsə, daha yaxşı nailiyyətlər əldə edə bilər. Deyirlər ki, PFL AFFA-nın səlahiyyətlərini icra edir. AFFA-nın işi onsuz da çoxdu. AFFA milli komandalarla məşğul olur, sponsorlar tapır. Biz belə görmüşük. Hakimlər PFL-ə tabe olanda görmüşük çempionatda oyunlar necə idarə olunurdu, qərəz var idimi? Bunların hamısı göz qabağında olub. Əziyyətimiz hədər getmədi. Nəticə verdi. Ədalətli çempionat keçirirdik. Bu gün də ədalətlidi. Amma söz-söhbət var. PFL-in müstəqil fəaliyyət göstərməsi AFFA-nın özünə də xeyirdi. PFL-in bağlanması düzgün deyil. Dünyanın çox ölkəsində PFL fəaliyyətdədi. Bu qurum ləğv olunsa, səlahiyyətləri azalsa, gülünc olar. Hər halda, özləri bilər. Bizim qarışacağımız iş deyil. PFL müstəqil olmalıdı ki, çempionat şəffaf keçirilsin, heç kim deyə bilməsin ki, bu tapşırıqdı, göstərişdi. Bu gün PFL-dən mən də gözləmirəm ki, kiməsə azarkeşlik etsin, dayaq olsun.

(davamı olacaq)

MÜZƏFFƏR QULUZADƏ