Birvaxtlar Ramin Musayev ölkə futbolunun ən populyar adamlarından idi. Amma 2022-ci ilin iyulundan, yəni Peşəkar Futbol Liqasının prezidenti vəzifəsindən gedəndən bəri kölgəyə çəkilib.

"Football-plus.az" onunla müəyyən məsələlər ətrafında söhbətləşdi.

- Ölkə çempionatının oyunlarını izləyirsizmi? Sizin dövrünüzlə müqayisədə çempionatın səviyyəsində artım var, ya yox?
- Bəli, izləyirəm. Bir qədər qəliz sual verdiz. Bəzi çempionatlar bizim dövrümüzdə daha maraqlı olub, bəziləri indikilərin dövründə. Hər il fərqlidi. Maraqlı qarşılaşmalar izlədik. Gərgin oyunlar olur. “Araz-Naxçıvan” və “Turan Tovuz” bu mövsüm gözəl start götürüb. Bütün komandalara uğurlar arzulayıram. “Sabah” bir qədər geriləyib. Düşünürəm ki, onlar da normal oyun göstərməyə nail olacaq. Yəqin ki, “Sabah” köklü bir komanda qurmaq niyyətindədi. Tam istədikləri alınmır.

- PFL-in yeni rəhbərliyinin işindən razısızmı?
- Çox razıyam.

- Uzun müddətdi futboldan uzaqsız. Bu müddətdə futbol ictimaiyyətindən sizlə əlaqə saxlayan, ünsiyyətdə olduğunuz futbol adamları varmı?
- Media nümayəndələri ilə əlaqəm var. Mənim zamanımda “Neftçi”də olan futbolçular əlaqə saxlayır - həm legionerlər, həm də yerli futbolçular. Hazırda çalışan məşqçilərdən Ayxan Abbasov mənimlə maraqlanır. Ona da təşəkkür edirəm. Aftandil Hacıyev də əlaqə saxlayır. Tərlan Əhmədov işləməsə də, mənimlə maraqlanır.

- Yeni mövsümdən legioner limitinin ləğv olunacağı ilə bağlı müzakirələr gedir. Eyni zamanda 11 legioner meydana çıxa biləcək. Bu addım Azərbaycan futboluna nə verəcək, inkişafa, yoxsa tənəzzülə aparacaq?
- Çox yanlış fikrdi. Legioner limitinin artması legionerlərin pul qazanmasına aparır. Başqa heç nəyə aparmır. Azərbaycan futbolu bu qərardan heç nə qazanmaz, ancaq məğlub olar. Ona görə ki, yerli futbolçulara şans verilməyəcək. Onda millinin baş məşqçisindən hansı nəticəni tələb etmək olar? İstər incisinlər, istərsə də inciməsinlər, mən nə varsa, onu deməliyəm. Heç bir klubu yığma düşündürmür, hər biri ancaq rəhbərliyi və sponsoru qarşısında nəticə verməyə çalışır. Millimizi düşünən komanda görmürəm və hiss eləmirəm. Bu limit dəyişəndən sonra hansı irəliləyişdən danışa bilərik? Yenə də legionerlər qazanacaq. Heç nəyi gizlətmək olmur. Şükürlər olsun ki, arxiv var. Bu arxiv Peşəkar Futbol Liqası yaranandan bəri fəaliyyət göstərir. PFL-in yaranmasından əvvəlki dövrə də təsadüf edir, hansı futbolçuların gəldiyi, nə qədər oyunda iştirak etdiyi yazılıb. Gəlin “Neftçi”də çalışdığım dövrdəki legionerlərə nəzər yetirək. Heç bir legioner ehtiyat oyunçular skamyasında əyləşmədi. Zədədən sonra meydana çıxmaya bilərdi. Ancaq legioner futbolçuların hamısından istifadə olunub. Bu gün elə komandalarımız var ki, hər 6 aydanbir legioner dəyişir. Bəs kim qazanır deyə soruşsaz, deyərəm ki, həmin legionerlər qazanır. Vaxından əvvəl göndəriləndə klub cərimələnir. Bunlar həm kluba, həm də Azərbaycan futboluna ziyandı. Həmin pulları yerli futbolçulara və akademiyaya xərcləsələr, maksimum 5 ildən sonra artıq bəhrəsini görə bilərlər. Necə ki, keçmiş “İnter” oyunçu transfer edə bilmədi, aşağı yaş qrupundan, yəni əvəzedici heyətindən yararlandı. Hətta avrokuboklara vəsiqə qazandı. Bu faktdı. Peşəkar Futbol Liqası yaranan kimi bizim təşəbbüsümüzlə əvəzedici heyət yarandı. Həmin vaxt aparıcı klublar bir qədər etiraz etdi. Onlara əvəzedici heyətlə oynamaq maraqlı deyildi.

- İl dəyişdi... 2025-də azərbaycanlı azarkeşlərə və futbol ictimaiyyətinə nə arzulayırsız?
- İlk növbədə cansağlığı, sonra isə uğurlar. Kimlər ki vətənini və idmanını düşünür, onlara uğurlar arzulayıram. Kimlər düşünmürsə, onlara vicdan arzulayıram.

ƏSƏD SEYİDOV