Birvaxtlar "Neftçi"də icraçı direktor, vitse-prezident olan, ardınca 14 il Peşəkar Futbol Liqasına rəhbərlik edən, bu ilin iyulunda isə səhhətiylə bağlı tutduğu postdan istefa verən Ramin Musayevdən çoxdan xəbər yoxdu.

Bu boşluğu aradan qaldırmaq məqsədiylə onunla əlaqə saxladıq. Duzlu-məzəli açıqlamaları ilə gündəm yaradan Ramin bəylə budəfəki söhbətimiz necə alındı? Özünüz qərar verin.

- Ramin müəllim, hazırda nə işlə məşğulsuz?
- Novxanıdakı bağ evimdəyəm, heyvandarlıqla məşğulam. Ən sadiq canlılar olan atlarım və itlərim ilə vaxt keçirirəm.

- Səhhətiniz necədi?
- Şükür, salamatçılıqdı. Özümü yaxşı hiss edirəm.

- Demək istəyirsiz ki, futboldan uzaq qalmaq sizə düşərli olub?
- (gülür) Belə də demək olar.

- Ölkə çempionatını izləyirsiz?
- Vaxt olduqca baxıram. Sevindirici haldı ki, premyer-liqada həm komandaların sayı, həm də səviyyə artıb. Maraqlı çempionat gedir.

- Komandaların çıxışını necə qiymətləndirərdiz?
- "Qarabağ"ın səviyyəsi hamıya bəllidi. Ona görə "köhlən atlar" haqda əlavə nəsə deməyə ehtiyac yoxdu. Murad Musayev "Sabah"da yaxşı, döyüşkən komanda formalaşdırıb. Onun məşqçi fəaliyyəti mənə ləzzət edir. "Neftçi"dən daha yaxşı çıxış gözləyirəm, amma hələ ki komanda “qara zolaqdadı”. "Turan Tovuz" ilə "Kəpəz"in yenidən elitaya qayıtması sevindiricidi. Ayxan Abbasovu tovuzlu azarkeşlər böyük coşquyla qarşıladı. Bunun nəticəsidi ki, "Turan Tovuz"un ev oyunlarında azarkeşlər stadionu doldurur. Ayxan müəllim döyüşkən kollektiv yaratmaqla yaxşı mübarizə aparır. "Kəpəz" mövsümə yaxşı başlamadı. Çoxları bunu baş məşqçi Yaşar Vahabzadə ilə bağlasa da, mən belə düşünmürəm. Yaşar müəllim pis məşqçi deyil, sadəcə, bəxti gətirmədi. Onu Tərlan Əhmədov əvəzlədi. Hazırda millimizin sabiq kapitanı "Kəpəz"i dirçəltməkdədi. Düşünürəm ki, qışdan sonra daha güclü "Kəpəz" görəcəyik. Həmin sözləri "Səbail" haqda da təkrarlayardım. "Zirə" ilə "Qəbələ" mükafatçılar sırasına düşmək üçün sona qədər döyüşəcək. Hazırda narahatlıqla izlədiyim komanda "Sumqayıt"dı. "Kimayaçılar" daha yaxşı çıxış etməliydi, amma hamını təəccübləndirdilər. İnanıram ki, Samir Abasov komandanı toparlayaraq son pillədən yuxarı qaldıracaq.

- "Qarabağ" son turda səfərdə "Neftçi"ni darmadağın etdi. Oyun haqda təəssüratınız maraqlıdı.
- Oyuna baxmışdım. Yuxarıda qeyd etdiyim kimi, ağdamlıların gücü, səviyyəsi hamıya bəllidi. Onlar çempionatda bütün komandaları üstələyir. Qurban müəllim uzun illərin əməyi sayəsində hazırkı güclü "Qarabağ"ın əsas memarıdı və komandası sabit çıxış edir. Təbii ki, "Neftçi"nin 4 qol buraxaraq uduzmağını çoxları kimi mən də gözləmirdim. Düşünürəm ki, "Neftçi" daha yaxşı çıxış edə bilərdi.

- Bir vaxtlar rəhbərliyində təmsil olunduğunuz "ağ-qaralar" hazırda niyə tənəzzül yaşayır?
- Xalqımızın əksəriyyətinin ürəyində "Neftçi" sevdası var. Odu ki, komandanın hazırkı çıxışı azarkeşləri məyus edir. "Ağ-qaralar" sovetlər dönəmində də, müstəqillik illərində də ilklərə imza atıb. Düşünürəm ki, klubun rəhbərliyi hazırkı vəziyyətdən çıxış yolları axtarır. Ümid edirəm ki, komanda qış fasiləsində toparlanacaq.

- Yığmamızın 2022-ci ildəki çıxışını necə qiymətləndirərdiz?
- Son oyunların hamısında qələbə qazanıblar. Səhv etmirəmsə, ardıcıl 5 oyunda. Bu isə ilkdi. Çoxları baş məşqçini qınayır, onun yola salınmasını istəyrdi. Amma mən fərqli mövqedəyəm. Yığımanın səviyyəsi baş məşqçidən yox, birbaşa ölkə çempionatından asılıdı. Hazırda premyer-liqamızın səviyyəsi artıb. Bunun nəticəsidi ki, yığma yaxşı nəticələr göstərir. Mənim fikrim budu ki, gələcəkdə Azərbaycan millisindən uğurlar istəyiriksə, bölgələrdə futbolu inkişaf etdirmək, klublara güclü maliyyə dəstəyi göstərmək, elita klublarının sayını artırmaq lazımdı. Nə qədər güclü çempionatımız olacaqsa, elə də millimiz olacaq.

ABDULLA İSMAYILOĞLU