''Qalatasaray''ın tarixində iz buraxmış isimlərdən olan braziliyalı əfsanə Klaudio Taffarel Fatih Terim ilə bağlı maraqlı etiraf edib. Hazırda 59 yaşı olan Taffarel məhz Terimin sayəsində qapıçılar üzrə məşqçi kimi çalışmağa başladığını etiraf edib: ''Karyeramı bitirdikdən sonra nə menecer olmaq istəyirdim, nə də qapıçılar üzrə məşqçi. Amma iş elə gətirdi ki, futbolu buraxdıqdan sonra ilk işim menecerlik oldu. Beş il bu sahədə çalışdım. Yavaş-yavaş ''bu iş mənlik deyil'' kimi düşüncələrə qapılmağa başlayırdım ki, ''Qalatasaray''da məşqçim olmuş Fatih Terimdən zəng gəldi. Mənə ''gəl, mənim komandamda qapıçılar üzrə məşqçi ol'' dedi. Cavabımda ona ''cənab, qapıçılar üzrə məşqçi deyiləm və olmaq da istəmirəm, həyat yoldaşım Andrea ilə danış, çünki onun fikri önəmlidi'' dedim. Sonra Andrea mənə ''get, bir dəfə özünü yoxla'' dedi. Həmin gündən bu yana qapıçılar üzrə məşqçi kimi çalışıram''. Qeyd edək ki, ''Qalatasaray''da iki fərqli dönəmdə işləyən Taffarel ''Liverpul'' və Braziliya yığmasında da eyni vəzifədə çalışıb.