Önəmli transferlərə rəğmən, mövsümə istədiyi kimi başlaya bilməyən “Qalatasaray”da məşqçilər korpusundakı isimlərin sayı günü-gündən artır.

"Football-plus.az" xəbər verir ki, baş məşqçi Okan Burukun tələbi ilə Morits Folts onun köməkçilərindən birinə çevrilib. Bu təyinat klub tərəfindən rəsmən təsdiqlənib. Almaniyalı futbol adamı “Qalatasaray”da həm skaut kimi çalışacaq, həm də oyunlara hazırlıq prosesinə, rəqiblərin incələnməsinə ən son texnologiyalardan istifadə edilməsinə cavabdehlik daşıyacaq. Eyni zamanda “altyapı”ya da nəzarət edəcəl. Folts son 2 həftədə “sarı-qırmızılar”ın məşqçilər korpusuna daxil olan 2-ci isim oldu. Ötən həftə avstriyalı Sarqon Duranla da mövsümün sonuna qədər müqavilə imzalanmışdı. O, faktiki aut atışları və standart zərbələr üzrə məşqçi funksiyasını yerinə yetirəcək. 39 yaşlı almaniyalı Foltsa gəlincə, o daha öncə 2015-19-cu illərdə “Arsenal”da skaut kimi çalışıb. 2019-21-ci illərdə isə “Leyptsiq”də Yulian Naqelsmannın sağ əli hesab olunurdu. Amma Naqelsmann ötən yay “Bavariya”nın başına keçdikdən sonra Folts işsiz qalmışdı.

Futbolçu kimi “Uimbldon”, “Fulhem”, “İpsviç”, “Sankt Pauli”, “Münhen 1860” klublarında top qovmuş Foltsun məşqçilər korpusuna daxil edilməsi fanatlar arasında birmənalı qarşılanmadı. Çünki dərhal Domenek Torrentlə bağlı ötən mövsüm yaşanan hadisələr yada düşdü. Fatih Terim işinin başında ola-ola, o dönəmdəki rəhbərlik Torrentlə əlaqə quraraq ona köməkçi-məşqçi vəzifəsini təklif etmişdi. Sonradan bunun üstünün açılması qalmaqala səbəb olmuş və Terimin qovulmasının ardından məhz Torrent baş məşqçi postuna gətirilmişdi. Amma indiki məsələ bir qədər fərqlidi. Çünki bu təyinatı Okan Buruk özü rəhbərlikdən xaiş edib. Onun Foltsla təxminən bir ay öncə görüşdüyü və “Qalatasaray”a gəlməyi təklif etdiyi məlum olub. Son iki təyinatla birlikdə hazırda “Qalatasaray”da məşqçilər korpusuna daxil olanların sayı 13-ə yüksəldi! Duran və Foltsdan başqa İstanbul nəhəngində İrfan Saraloğlu ilə Serxio Qarsiya Qomes köməkçi-məşqçi, Fadıl Koşutan ilə Can Okuyucu qapıçılar üzrə məşqçi funksiyasını yerinə yetirir. Dursun Gənc, Kaan Arısoy, Yusuf Köklu və Fuat Dəmir oyunçuların fiziki durumuna görə cavabdehlik daşıyır. Yılmaz Yüksəl, Sərhat Doğan, Can Mutlu isə performans və oyun analizçisi funksiyasını icra edir.