Məlum olduğu kimi ''Fənərbaxça'' Avropa Liqasında pley-offun ilk oyununda evdə ''Nottingem Forest''ə 0:3 məğlub oldu.

"Football-plus.az" xəbər verir ki, bu qarşılaşma İstanbul nəhənginin yeni transferi Sidiki Şerif üçün fərqli baxımdan əlamətdar oldu. ''Sarı-lacivərdlilər'' bu qış bu futbolçunu Fransa təmsilçisi ''Anje''dən 4 milyon avroya icarəyə götürüblər. Müqavilədə məcburi transfer maddəsinə dair bir anlaşma olduğu bildirilsə də, konkret məlumat yox idi. Ancaq detallar indi bəlli olub.

Türkiyə mətbuatının yazdığına inansaq məcburi transfer maddəsi Şerifin start heyətində meydana çıxdığı ilk matçdan sonra dərhal qüvvəyə minməli idi. Bu, məhz ''Nottingem Forest''lə oyunda baş verdi. Bu da o deməkdi ki, ''Fənər'' yayda fransızlara daha 18 milyon avro ödəyərək Şerifi daimi əsasda transfer etməli olacaq! Başqa sözlə desək, 19 yaşlı futbolçu ''Fənərbaxça''ya ümumilikdə 22 milyon avroya başa gələcək.

Maraqlıdı ki, ''transfermarkt''da onun dəyəri cəmi 7 milyon avro qeyd olunub. Fransalı forvard ingilislərə qarşı matçda 90 dəqiqə meydanda olsa da, demək olar, heç nə ilə yadda qalmadı. 25 dəfə topa toxunan futbolçu qapıya yalnız bir zərbə endirdi.

Şerif hələ ki, yeni klubunda 3 rəsmi oyunda 125 dəqiqə meydanda olub və aktivinə məhsuldar hərəkət yaza bilməyib.