Ştayner “Haas”dan getməklə arzularına yol açıb
"Football-plus.az" xəbər verir ki, “Formula-1” komandalarından “Haas”ın sabiq rəhbəri, 2005-08-ci illər aralığında “Red Bull”da çalışan Günter Ştaynerin dediyinə görə, Avstriya komandasından ayrılmaq onun Amerika ilə bağlı arzularının gerçəkləşməsinə yol açan dönüş anı olub:
“Geri boylanarkən anlayıram ki, bu, mənim üçün xoşbəxt an idi. Ona görə ki, getməklə Amerikanın qapıları üzümə açıldı. Yeniyetmə vaxtı həmişə Birləşmiş Ştatlarda yaşamağı arzulayırdım. Ancaq heç cür alınmırdı. Çünki bunun üçün işçi vizası lazımdı. “Red Bull”dan ayrılandan sonra belə imkan yarandı”.
Ştayner bu köç sayəsində həlledici layihələrini də reallaşdıra bilib:
“Kompozit materiallar istehsal edən şirkət açdım. Hazırda şirkətdə 300 adam çalışır. Ardından “Formula-1” komandası yarada bildim”.
Ştaynerin fikrincə, Avropada onun belə imkanı olmayacaqdı. Odu ki, italiyalı “Red Bull”dan ayrılmaqla taleyüklü qərar verib:
“Red Bull”dan getmək həyatımın ən yaxşı hadisəsidi”.
Xatırladaq ki, Ştayner 2014-dən bəri “Haas”da çalışıb və 2024-ün yanvarında bu komandanın rəhbəri postunu tərk edib.
Digər xəbərlər
