Ferstappenin qəfil və müəmmalı səfəri
“Red Bull”un pilotu Maks Ferstappen iyulun 11-də Sardiniyaya yollanıb.
“Mersedes”in rəhbəri Toto Volffun da İtaliyanın adı çəkilən şəhərində görünməsi şayiələrə yol açıb. Axı son günlərdə niderlandlı pilotun “Mersedes”ə mümkün keçidi ilə bağlı xəbərlər dolaşır. Cari mövsümdə 12 mərhələdən sonra 165 xalla 3-cü yerdə qərarlaşan Ferstappenin indiki durumdan məmnun olmadığı hər kəsə aydındı. Ancaq konkret Sardiniya səfərinə gəlincə, Maksın rəfiqəsi Kelli Pike sosial şəbəkə hesabında yaydığı şəkillə məsələyə aydınlıq gətirib. O, pilotla birgə şəklinin altında belə yazıb: “Kiçik məzuniyyət”.
“Haas”ın sabiq rəhbəri Günter Ştayner də əmindi ki, Ferstappen 2026-cı ildə komandasını dəyişməyəcək:
“Düşünürəm ki, Maksın gələn il “Red Bull”da qalacağı dəqiqdi. O, vəziyyətin necə olacağına baxacaq – hansı komanda güclüdü, hansı zəifdi. Maksın müqaviləsində növbəti mövsüm yaxşı alınmayacağı təqdirdə getməsinə imkan verən bənd var. Ancaq indi keçid çox riskli olardı”.
Ştaynerin fikrincə, 2027-ci ildə də Ferstappenin komandasını dəyişmək şansı olacaq, ancaq tələsik qərar verməyə dəyməz:
“Ən yaxşı komanda həmişə ən yaxşı pilotu istəyir, ən yaxşı pilot də ən yaxşı komandanı. Ancaq əvvəlcə anlamaq lazımdı ki, reqlament dəyişəndən sonra kim gerçəkdən lider olacaq. Cəmi birillik müqavilə bağlamaq məntiqsizlikdi”.
Ferstappenin tezliklə komandasını dəyişəcəyini düşünənlər də var. “Formula-1”in sabiq pilotu Ralf Şumaher belə hesab edir ki, Hornerin “Red Bull”un rəhbər postundan getməsinə baxmayaraq, niderlandlı pilot da ayrıla bilər:
“Düşünmürəm ki, bu iki məsələ bir-biri ilə birbaşa bağlıdı. Güman edirəm ki, Maks da eyni mövqedədi. Əlbəttə, Ferstappen “Red Bull”da qalmaq istəyərdi, mümkün olsaydı. Onun üçün hər şey “Red Bull”da başlayıb, çox şeyə görə bu komandaya borcludu. Ancaq bu durumdan çıxmaq üçün zamana ehtiyac var. Gələn il yeni reqlament işə düşəcək, “Red Bull” vəziyyəti düzəldə bilər. Şəxsən mənə bunun necə baş verəcəyini təsəvvür etmək çətindi. Axı Pyer Vaşe son iki il ərzində güclü və idarə oluna bilən maşın qurmayıb. Bu üzdən Ferstappen heç nəyi nəzərə almadan komandadan getmək variantını gözdən keçirir”.
